Lajme

Avokati Bajraktari reagon ndaj deklaratave të Kurtit për ish-krerët e UÇK-së: Në kohë të pakohë po i ndihmohet Prokurorisë Speciale

Autori: Gazeta inFokus 13:19 | 03 Korrik 2025

Avokati Ardian Bajraktari ka reaguar ashpër ndaj deklarimeve që lidhin ish-krerët e Ushtrisë Çlirimtare të Kosovës me zhvillimet politike aktuale, duke i quajtur ato të pabaza dhe të dëmshme për procesin gjyqësor që po zhvillohet ndaj tyre në Hagë.

“Deklarimet se ish-krerët e UÇK-së janë të përfshirë apo japin instruksione në çështje politike, përveçse janë goditje e ulët dhe nën brez, janë tërësisht të pasakta dhe të pamundura të ndodhin,” u shpreh Bajraktari.

Ai theksoi se çdo vizitë apo kontakt me të akuzuarit monitorohet në mënyrë të rreptë nga Gjykata Speciale, gjithmonë në prani të së paku dy personave, duke e bërë të pamundur dhënien e çfarëdo instruksioni apo ndërhyrjeje, shkruan Gazeta Infokus.

-Advertisement-

“Kryeministri i Kosovës jo vetëm që nuk ka marrë mundin t’i vizitojë asnjëherë ish-krerët e UÇK-së, por me qëndrimet e fundit ka treguar edhe mosinteresim të plotë për ta,” shtoi ai.

Sipas Bajraktarit, deklarime të tilla ndihmojnë drejtpërdrejt Prokurorinë e Speciales, e cila në raste të kaluara ka përdorur deklarata publike – madje edhe nga analistë televizivë – si arsye për zgjatjen e masës së paraburgimit ndaj të akuzuarve.

“Kjo nuk është ndihmë për drejtësinë, përkundrazi – është ndihmë për padrejtësinë. Ata nuk janë të akuzuar si individë, por si ish-krerë të Ushtrisë Çlirimtare të Kosovës. Nëse nuk mund t’i ndihmoni, të paktën mos e rëndoni situatën,” përfundoi Bajraktari, duke e cilësuar këtë si një “kohë të pakohë”, ku çdo veprim i pamatur mund të përkeqësojë pozitën e tyre para gjykatës.