Auto&Tech

Gara me makinat elektrike, bashkohen Nissan e Honda?! “Çmendet” çmimi i aksioneve

Autori: Gazeta inFokus 14:20 | 18 December 2024

Gjigantët japonezë të automjeteve, Nissan Motor Corporation dhe Honda Motor Company janë duke zhvilluar bisedime mbi një bashkim të mundshëm të tyre, mesrritjes së ndjeshme të konkurrencës nga ana e prodhuesve të makinave elektrike (EV), veçanërisht atyre në Kinë.

Eksplorimin e një partneriteti të mundshëm mes tyre, dy kompanitë e kishin nënkuptuar që në muajin mars. Pas lajmit të fundit, çmimi i aksioneve të Nissan-it në Tokio u rrit me mbi 22 për qind, ndërsa ato të Hondës pësuan nga ana tjetër rënie me 3 për qind.

Nëse shkrirja ndodh vërtet, dy kompanitë mund të krijojnë grupin e tretë më të madh prodhues të automjeteve në botë. Sipas raportimeve, anëtari i aleancës Nissan, Mitsubishi Motors Corporation, është, po ashtu, i përfshirë në bisedime.

-Advertisement-

Që të tre prodhuesit japonezë të automjeteve e kanë lënë të kuptohet se planifikojnë të ndajnë me njëri-tjetrin përbërës për automjete elektrike, si bateritë, dhe të punonin bashkërisht për programet për ngasje autonome, për t’iu përshtatur më mirë ndryshimeve dramatike në industrinë e automjeteve, të përqendruara rreth elektrifikimit.

Një bashkim i kompanive mund të rezultojë në një gjigant me vlerë prej rreth 55 miliardë dollarësh, bazuar në vlerën në treg të të gjithë tre prodhuesve të automjeteve.

Bashkimi i forcave do t’i ndihmonte dy kompanive të rrisnin peshën për të garuar me liderin japonez të tregut, Toyota Motor Corporation, dhe me Volksëagen AG-në e Gjermanisë.