Rivalitetet e futbollit janë disa nga gjërat më të mira që një shtet mund të dhurojë – si në rastin e tanishëm, “El Clasico” që vjen nga Spanja.

Përballja mes Real Madridit dhe Barcelonës zgjon interesimin nga të gjithë futbolldashësit anëembanë botës, të cilët i rrethojnë datat në kalendar të çdo përballje mes klubeve respektive.

Por, çfarë do të thotë ky term: “El Clasico”?

“El Clasico” është emri që i vihet çdo përballje mes Real Madridit dhe Barcelonës. Është fjalë spanjolle që në shqip përkthehet si “Klasikja”.

Ndeshjet që përfshijnë Real Madridin e Barcelonën, janë ndeshjet më kulminante të futbollit spanjoll, andaj edhe është dhënë idea që të marrë emrin “El Clasico”.

Në fakt, “El Clasico” ka edhe një kuptim më të gjerë edhe jashtë fushës së blertë, duke qenë një simbol i luftës së famshme civile në Spanjë.

Ndeshjet e Real Madridit ndaj rivalit lokal, Atleticos quhen “El Otro Clasico”, apo në shqip “Klasikja tjetër”.

KUR U BË REAL MADRID VS. BARCELONA NJË “EL CLASICO”?

Çuditërisht, përdorimi i “El Clasico” për ndeshjen Real Madrid vs. Barcelona ka hyrë në leksikun e gjuhës së futbollit të Spanjës tek në mesin e viteve 2000.

Deri në atë kohë, ndeshja mes Realit dhe Barçës më shpesh quhej “El Derbi” ose vetëm Madrid – Barça dhe anasjelltas.

Besohet se futbolli spanjoll mori inspirim nga Amerika e Jugut dhe Qendrore, pasi aty çdo ndeshje derbi merr epitetin “Clasico”.

“Clasico” më e famshme në Amerikën e Jugut është ajo mes Boca Juniors dhe River Plate, që ndryshe njihet edhe si “Superclasico”.

PSE JANË BARÇA DHE REALI RIVALË?

Barcelona dhe Real Madridi janë të vendosura në pjesë të ndryshme të Spanjës, andaj pse janë rivalë? Urrejtja mes klubeve sa është sportive, aq është edhe politike!

Rivaliteti mes klubeve nisi qysh në Luftën Civile të Spanjës, derisa ky rivalitet u bë më i fortë pas Luftës së Dytë Botërore.

Katalonia gjithmonë ka qenë një vatër republikane, derisa Madridi ka qenë qendra e fuqisë politike, e udhëhequr nga Gjenerali Franco dhe nga Familja Mbretërore e Spanjës.

Motoja e Barçës “Mes Que un Club” (Më shumë se një klub), bën me dije se klubi ka të bëj më shumë se sporti. Është një simbol i krenarisë për Kataluninë, që tash e shumë vite po kërkon pavarësinë.

Megjithëse sot ka paqe në Spanjë, idetë e Luftës Civile të Spanjës ekzistojnë ende dhe ndeshja mes Barçës dhe Real Madridit e konfirmon këtë ndarje.

Fakti që dy klubet luftojnë njëra-tjetrën për La Ligan, Copa del Rey dhe Ligën e Kampionëve, e bën këtë rivalitet më të ndjeshëm.