Lajme

EULEX me donacion në nënstacionin policor në Suhodoll, qasje për komunitete

Autori: Gazeta inFokus 11:54 | 04 April 2024

Ushtruesja e detyrës së Shefes së Misionit të Bashkimit Evropian për Sundim të Ligjit në Kosovë (EULEX), Emily Rakhorst, i dorëzoi dy kontejnerë Koloneles së Policisë së Kosovës Afërdita Mikullovci, të cilët do të përdoren për riaktivizimin e nënstacionit policor në Suhodoll.

“Duke bërë të mundur riaktivizimin e nënstacionit, EULEX-i mbështetë Policinë e Kosovës në angazhimet e saj me shërbime policore të orientuara drejt komunitetit, me qëllim të adresimit të nevojave lokale dhe parandalimit të krimit, dhe në bazë të parimeve të ndërtimit të besimit, llogaridhënies, informimit dhe komunikimit”, thuhet në komunikatën e EULEX.

Sipas komunikatës, ky donacion do të mundësoj që banorët të kenë qasje më të mirë në shërbimet policore, të orientuara në komunitet në të dyja gjuhët zyrtare të Kosovës dhe të kontaktojnë drejtpërdrejt Policinë e Kosovës për dorëzimin e aplikacioneve apo të ankesave.

-Advertisement-

“Tutje, prania e vazhdueshme e Policisë së Kosovës në nënstacionin policor në Suhodoll pritet të përmirësojë gjendjen e sigurisë përmes avancimit të kapacitetit të policisë për promovimin dhe mbrojtjen e sigurisë së të gjithë atyre që jetojnë në atë zonë, në një mënyrë të orientuar drejt komunitetit”, njofton EULEX.

Subscribe në YouTube: GAZETA INFOKUSI