Lajme

Lladrovci përkujton masakrat serbe në Poklek dhe Çikatovë: Ditë e rëndë për Drenasin dhe Kosovën!

Autori: Gazeta inFokus 16:13 | 17 April 2023

Kryetari i komunës së Drenasit, Ramiz Lladrovci, me kryetarin e PDK-së, Memli Krasniqi me bashkëpunëtorë, kanë bërë homazhe dhe kanë vendosur kurora me lule me rastin e përvjetorit të masakrave serbe në Poklek dhe Çikatovë të Vjetër.

Me këtë rast, ai në rrjetin social ka shkruar:

Ditë e rëndë për Drenasin dhe Kosovën, ditë kur gjenocidi serb mori hov për realizimin e veprave të tyre të kobshme kundër popullit tonë.

-Advertisement-

Homazhet e kësaj dite i filluam nga Krajkova, duke bërë homazhe dhe vendosëm buqetë me lule në Memorialin e dëshmorëve, për heroin e Kosovës, Sokol Elshani.

Sokoli ishte shembull trimërie e atdhedashurie për të gjithë neve që e kemi njohur dhe mbetet shembull për gjeneratat që do të vinë. Çlirimtarët si Sokoli janë themeli i palëkundur i atdheut tonë të lirë.

Homazhet i vazhduam në Poklek dhe Çikatovë të Vjetër, bashkë me kryetarin Krasniqi dhe bashkëpunëtorët, ku përkujtuam familjet e ekzekutuara nga ushtria serbe që dëshmonin pafuqinë e vet ndaj vullnetit të popullit tonë për çlirim.

Përjetësisht në mendjet dhe zemrat tona pjesëtarët e Familjes Muqolli, Elshani, Caraku, Morina dhe dëshmorët tjerë të kombit që u masakruan vetëm pse ishin shqiptarë.

Në këtë ditë, barbarisht u vra edhe poeti, emblemë e poezisë për fëmijë, Ymer Elshani bashkë me nënën, bashkëshorten dhe katër djemtë.

Sakrifica e popullit tonë ishte e jashtëzakonshme, andaj, sot e gjithmonë do t’i kujtojmë me nderim dhe punojmë për jetësimin e idealeve të qytetarëve tanë për liri dhe shtet.

Deri sot, askush nuk u ballafaqua me drejtësinë për gjenocidin serb në Poklek dhe Çikatovë të Vjetër.

Lavdi heronjve, dëshmorëve dhe martirëve të lirisë!

Lavdi Ushtrisë Çlirimtare të Kosovës!

Subscribe në YouTube: GAZETA INFOKUSI