Një marrëveshje që e pranojnë të dyja palët është ajo që i nevojitet Kosovës dhe Serbisë. Është ky mendimi i ambasadores së SHBA në OKB, Linda Thomas-Greenfield, e cila u shpreh gjatë një interviste për emisionin “Opinion” në Tv Klan se të dyja palët duhet të vazhdojnë drejt paqes sepse nuk ka alternativë tjetër.

“Për vite me radhë ne kemi mbështetur ecjen përpara dhe vendosjen e stabilitetit në këtë rajon dhe do të vazhdojmë të punojmë drejt stabilitetit. E patëm këtë diskutim sot me qeverinë shqiptare se si mund të komunikojmë më mirë për këto çështje dhe se çfarë veprimesh shtesë mund të ndërmarrim për t’u siguruar që stabiliteti të vendoset dhe që vendi të mos përfundojë në konflikt përsëri”, deklaroi ajo.

Ambasadorja Thomas-Greenfield tha se nuk mendon se dikush dëshiron të shoh sërish konflikt.

“Zgjidhja? E dini, mendoj se një marrëveshje midis të dy palëve është një marrëveshje që e pranojnë të dyja palët. Ajo nevojitet. Është ende problem pas 23 vjetësh. Por nuk kemi hequr dorë dhe as ata nuk duhet të heqin dorë. Duhet të vazhdojnë drejt paqes sepse nuk ka alternativë. Nuk mendoj se ndonjë prej nesh do që t’i shohë të kthehen tek konflikti përsëri”, tha ajo.

Edhe ambasadori i Shqipërisë në OKB, Ferit Hoxha, u shpreh se nuk do të ketë asnjë zgjidhje nëse mes dy palëve nuk ka një marrëveshje.

“Arritja e marrëveshjeve të tilla mes kundërshtarësh dhe duke pasur parasysh ç’ka ndodhur në Kosovë, siç e dimë, nuk është e lehtë. Prandaj ka zgjatur kaq shumë kohë. Por këtë herë po ndodh diçka ndryshe dhe duhet ta kuptojmë dhe duhet të komunikojmë për këtë. Është hera e parë që kemi jo një të dërguar të posaçëm të BE-së, por kemi edhe të dërguarin e posaçëm të SHBA dhe këshilltarët e posaçëm të politikës së jashtme të qeverive franceze dhe gjermane. Pra, kemi katër persona. Kemi kaq shumë fuqi të bërë bashkë që nuk ka ndodhur më parë me një propozim konkret në tryezë. Dhe kjo është diçka që as Kosova dhe as Serbia nuk duhet ta çojnë dëm. Është një çast unik për ta nxitur fort”, tha Hoxha.

Ambasadori Hoxha u shpreh se nuk do të ketë zgjidhje në asnjë nga çështjet nëse nuk ka marrëveshje. Dhe për marrëveshje, duhen dy palë.

“Mendoj se mund të merremi me të gjitha këto çështje teknike dhe ato kanë rëndësinë e tyre. Asgjë, as targat, nuk kanë atë lloj rëndësie, domethënieje sa përpjekja për të ecur vërtet përpara sepse është e vetmja mënyrë për të ecur përpara. Nuk do të ketë zgjidhje në asnjë nga çështjet nëse nuk ka marrëveshje. Dhe për marrëveshje, duhen dy palë”, tha ai në Tv Klan.

FREE FRIDAY ME ZBRITJE DERI 70%

Sponsoruar