Lajme

Sulmohet një tjetër shkollë në SHBA! Ish-nxënësi vret dy persona, më pas veten

Autori: Gazeta inFokus 08:18 | 25 October 2022

Të paktën tre persona, përfshirë edhe të dyshuarin, u vranë dhe shtatë të tjerë u plagosën gjatë të shtënave në një shkollë të mesme në Shën Luis të Misurit.

Sulmuesi hyri në shkollën e mesme të arteve vizuale dhe performuese pak pas orës 09:00 sipas kohës lokale më 24 tetor.

Dyert e shkollës ishin të mbyllura dhe nuk është e qartë se si sulmuesi hyri në objekt. Dëshmitarët thanë se shumë persona shpëtuan pasi sulmuesit iu bllokua arma në mes të sulmit.

-Advertisement-

Autoritetet thanë se policia amerikane “shumë shpejt e ndali” sulmuesin. I dyshuari, i identifikuar si policia si një 19-vjeçar, ish-nxënës i kësaj shkolle, shkëmbeu zjarr me policinë dhe më pas vdiq nga plagët e marra.

Ende është e paqartë se cili ishte motivi i sulmit në shkollën ku ndjekin mësimet afër 400 nxënës.

Policia tha se një vajzë adoleshente vdiq brenda shkollës dhe një grua më pas ndërroi jetë në spital.

Shtatë të plagosurit – tri vajza dhe katër djem – janë jashtë rrezikut për jetë, raportuan mediat lokale.

Nxënësit nisën të iknin nga shkolla, kur policia arriti në vendin e ngjarjes dhe sulmuesi kishte “një armë të gjatë”, tha shefi i policisë së qytetit, Michael Sack.

Ai tha se pak pas nisjes së sulmit, punëtorët e sigurisë së shkollës vepruan shpejt dhe njoftuan stafin e shkollës, të cilët më pas thirrën policinë.

Sulmuesit iu gjetën qindra fishekë, tha Sack, duke shtuar se “kjo ngjarje mund të përfundonte edhe më keq”.

“Kjo është një ngjarje e tmerrshme për të gjithë ne”, tha ai dhe shtoi se agjentët e FBI-së po ndihmojnë në hetimin e ngjarjes.

Policia tha se sulmuesi kishte përfunduar mësimet në këtë shkollë vitin e kaluar dhe nuk kishte histori kriminale.

Një nga viktimat është identifikuar nga familjarët e saj si Jean Kuczka, 61 vjeçare, arsimtare e shëndetësisë.

Sipas të dhënave të organizatave arsimore në SHBA, gjatë këtij viti janë regjistruar të paktën 35 të shtëna në shkolla.

Subscribe në YouTube: GAZETA INFOKUSI
Etiketa:
-Advertisement-

Të tjera

Fokusi

lajme