Lajme

Vllasi: Serbia po sillet si në vitin ’87, Kosova s’duhet të heqë dorë nga vendimet e saj

Autori: Gazeta inFokus 08:20 | 02 August 2022

Ish-politikani Azem Vllasi është i mendimit që Kosova s’duhet të heqë dorë nga vendimet e saj për vendosjen e reciprocitetit ndaj Serbisë.

Për më tepër, Vllasi s’po e sheh si çështje shumë të madhe shtyrjen e këtij vendimi, por thotë se me rëndësi është që të gjendet zgjidhja.

“Nuk është e thënë që të ndodhë pas 29 ditëve. Një zgjidhje me rëndësi është të gjendet. Duhet Brukseli dhe aleatët perëndimorë të luajnë rolin e ndërmjetësuesit në këtë çështje. Që nuk vjen te një marrëveshje nuk është kiameti të shtyhet edhe pak. Kosova duhet ta ushtrojë pushtetin në tërësi në tërë territorin e saj. A do të arrihet marrëveshja brenda 29 ditëve apo të shtyhet edhe pak nuk është kiamet. Por, nuk duhet hequr dorë nga parimi i reciprocitetit. Serbia është ajo që duhet të sillet ndryshe. Në kalimin kufitar duhet të heqë dorë nga dhënia e asaj cope letre për qytetarët e Kosovës apo të pajtohet me reciprocitet”, ka thënë Vllasi në KTV.

-Advertisement-

Avokati Vllasi ka thënë se shteti serb po sillet sikurse në vitin 1987 me manipulime e dezinformata dhe se ngjarjet në veri po ia kujtojnë këtë.

Po ashtu, ai tha se Serbia po tenton të krijojë tensione në Kosovë edhe për të shpërqendruar opinionin nga agresioni rus në Ukrainë.

“Ata e kanë vlerësuar se Serbia dëshiron të krijojë tensione në Kosovë e rajon për ta tërhequr vëmendjen nga agresioni rus në Ukrainë. Perëndimorët janë angazhuar të qetësohet situata e kjo çështje të shtyhet. Asnjë nga perëndimorët nuk tha të hiqet dorë nga parimi i reciprocitetit. Nuk ka shans e as mënyrë që Serbia ushtarakisht apo me forcë të angazhohet në Kosovë, sepse hyn në luftë me NATO-n. Kosova s’është anëtarë e NATO-s, por NATO është në Kosovë”, tha Vllasi.

Subscribe në YouTube: GAZETA INFOKUSI