Lajme

PDK: Qeverisja e keqe po i varfëron qytetarët

Autori: Gazeta inFokus 14:35 | 05 Qershor 2022

Anëtari i Kryesisë së Partisë Demokratike të Kosovës, Blerand Stavileci, sot ka mbajtur konferencë për media, ku tha se qeverisja e keqe po i varfëron qytetarët.

Stavileci tha se Kosova ka shënuar deficitin më të lartë tregtar, rreth 4.6 miliardë euro.

“Ditët po ecin e javët po shkojnë. Kriza ekonomike po thellohet. Qytetari e familja po varfërohet. Shporta e prodhimeve të konsumit po pakohet. E, Qeveria dhe Pushteti po vazhdojnë të struken dhe ta vështrojnë krizën nga jashtë, pa ndërmarrë masa konkrete ekonomike dhe fiskale që ta zbusin këtë rëndim të jetesës së qytetarëve dhe familjeve kosovare”, ka thënë Stavileci.

-Advertisement-

“Të gjitha çmimet po vazhdojnë të rriten, e pagat nuk kanë lëvizur. Jeta çdo ditë e më shumë po shtrenjtohet. Në vend të dialogut social Qeveria ka imponuar injorimin institucional dhe kjo ka sjellë sot më shumë se kurrë pakënaqësinë më të madhe të qytetarëve dhe sindikatave të cilat po protestojnë vazhdimisht në kërkim të të drejtave elementare dhe të zgjidhjeve për t’i tejkaluar gjithë këto kriza. Derisa ne po flasim në vendin tonë çdo ditë po shohim raporte e vlerësime të reja në lidhje me ekonominë, të cilat do të duhej ta zgjonin nga gjumi pushtetin”, ka thënë anëtari i Kryesisë së PDK-së.

Në fund, ai ka thënë se qytetarët duan zgjidhje.