Lajme

Kurti në njëvjetorin e qeverisjes: U shënua rritje ekonomike, rezultate të mira në luftën kundër krimit e korrupsionit

Autori: Gazeta inFokus 12:15 | 22 March 2022

Kryeministri i Kosovës, Albin Kurti, në njëvjetorin e votimit të Qeverisë, tha se gjendja me pandeminë është vënë nën kontroll dhe situata është përmirësuar dukshëm, ndërsa është shënuar rritje ekonomike dhe rezultate të mira në luftën kundër krimit e korrupsionit.

Këto të arritura, Kurti ia tregoi historianit, Oliver Jens Schmitt, gjatë takimit të sotëm.

Schmitt e përgëzoi kryeministrin për të arriturat dhe për stabilitetin politik në qeverisje. Ai e vlerësoi Kosovën si vendin me demokracinë më funksionale në rajon, me media dhe shoqëri të lirë. Bashkimi Evropian duhet ta vlerësojë këtë progres të Kosovës, tha Schmitt.

-Advertisement-

Ndër të tjera, ata diskutuan për invazionin dhe agresionin rus në Ukrainë dhe ndikimin që mund të ketë në Evropë e posaçërisht në rajonin e Ballkanit Perëndimor.

Oliver Jens Schmitt është profesor i historisë së Evropës Juglindore në Universitetin e Vjenës dhe studiues i albanologjisë. Ai është anëtar i rregullt i Akademisë Austriake të Shkencave dhe anëtar nderi i Akademisë së Kosovës.

Schmitt i dhuroi Kurtit librin e tij të fundit, përmbledhjen në pesë vëllime të korrespondencave të konsujve austriakë për Kosovën me titull: “Politika dhe Shoqëria e Vilajetit të Kosovës”.