Drejtori i përgjithshëm i Organizatës Botërore të Shëndetësisë (OBSH), Tedros Ghebreyesus, ka deklaruar se lloji i ri Omicron i koronavirusit COVID-19 është konfirmuar në 77 vende dhe po përhapet më shpejt se çdo lloj i mëparshëm, transmeton Anadolu Agency (AA).

“Omicron ndoshta është në shumicën e vendeve, edhe nëse akoma nuk është zbuluar. Omicron po përhapet me një ritëm që nuk e kemi parë me asnjë lloj të mëparshëm”, tha Ghebreyesus në një konferencë për media në Gjenevë.

Lloji Omicron, i zbuluar për herë të parë muajin e kaluar në Afrikën e Jugut, u shpall si një lloj shqetësues nga agjencia shëndetësore e Kombeve të Bashkuara (OKB).

-Advertisement-

Ghebreyesus shprehu shqetësimin për njerëzit që e konsiderojnë llojin Omicron si të butë, duke theksuar se edhe nëse shkakton sëmundje më pak të rënda, numri i madh i rasteve mund të mbingarkojë edhe një herë sistemet e pa përgatitura shëndetësore.

Ai u bëri thirrje vendeve që të zbatojnë masa kufizuese së bashku me vaksinat për të dalë nga kriza.

“Nuk janë vaksinat në vend të maskave. Nuk janë vaksinat në vend të distancimit. Nuk janë vaksinat në vend të ventilimit apo higjienës së duarve. Bëni të gjitha. Bëni vazhdimisht. Bëni mirë”, tha Ghebreyesus.

Shefi i OBSH-së tha se disa vende kanë nisur fushata përforcuese të vaksinave dhe shtoi se kjo mund të çojë në “grumbullimin e vaksinave që pamë këtë vit dhe të përkeqësojë pabarazinë”.

“Më lejoni të jem shumë i qartë… OBSH nuk është kundër përforcuesve. Ne jemi kundër pabarazisë. Shqetësimi ynë kryesor është të shpëtojmë jetë kudo. Dhënia e përforcuesve për grupet me rrezik të ulët të sëmundjes së rëndë ose vdekjes thjesht rrezikon jetën e atyre me rrezik të lartë ose që akoma presin dozën e tyre primare për shkak të kufizimeve të furnizimit. Prioriteti në çdo dhe globalisht duhet të jetë mbrojtja e më pak të mbrojturve, jo e më të mbrojturve”, u shpreh Ghebreyesus.

Duke ndarë të dhënat, ai tha se 41 vende akoma nuk kanë qenë në gjendje të vaksinojnë 10 për qind të popullsisë së tyre dhe 98 vende nuk kanë arritur në 40 për qind.

“Nëse i japim fund pabarazisë, i japim fund pandemisë. Nëse lejojmë që pabarazia të vazhdojë, ne lejojmë që pandemia të vazhdojë”, tha ai.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-