Gjykata Themelore në Prishtinë, e ka refuzuar si të pabazuar kërkesën për hudhje të aktakuzës të ish-kryeshefit të Komisionit të Pavarur për Media (KPM), Luan Latifi dhe po ashtu ka ndërprerë masën e arrestit shtëpiak ndaj tij dhe ish-drejtorit të Administratës dhe Financave në KPM, Arben Bilallit.

Lajmin e ka konfirmuar zëdhënësja e Gjykatës Themelore në Prishtinë, Mirlinda Gashi.

“Duke iu referuar kërkesës tuaj për informacione ju njoftojmë se Gjykata Themelore në Prishtinë më datë 2 nëntor 2021 ka refuzuar si të pabazuar kërkesën e të akuzuarit L.L për hudhjen e aktakuzës dhe lënda gjendet në gjykatën e Apelit, për vendosje sipas ankesës”, tha Gashi.

Ajo po ashtu ka njoftuar se të akuzuarve nuk iu është vazhduar masa e arrestit shtëpiak, pasi siç tha ajo gjykata nuk ka pranuar propozim nga prokuroria për vazhdimin e kësaj mase, raporton “Betimi për Drejtësi”.

“Të pandehurve më datë 22 nëntor 2021 iu ka skaduar masa e arrestit shtëpiak dhe të njëjtëve nuk iu është vazhduar pasi që gjykata nuk ka pranuar propozim nga ana e Prokurorit të Shtetit për vazhdimin e masës siç parashihet në nenin 183, paragrafi 8 të KPPRK-së”, ka njoftuar Gashi.

Sipas saj, i akuzuari Bilalli dhe mbrojtësi i tij, nuk kanë paraqitur kërkesë për hudhje të aktakuzës dhe kundërshtim të provave.

Aktakuza e ngritur më 15 shtator 2021, ngarkon Luan Latifin se në cilësinë e kryeshefit të Komisionit të Pavarur për Media (KPM) dhe Arben Bilalli në cilësinë e drejtorit të Administratës dhe Financave në KPM, gjatë qershorit 2021, kishin kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “Tel Kos”.

Në aktakuzë thuhet se ky ryshfet ishte pranuar nga ana e të akuzuarve me qëllim që kompanisë “Tel Kos”, të mos i shqiptohet gjobë për shkak se e njëjta kishte bërë shkelje ligjore duke bërë shtrirje të rrjetit në disa vende për të cilat nuk e kishte njoftuar KPM-në.

Sipas aktakuzës, Bilalli më 24 qershor 2021, ishte takuar në zyrën e tij me pronarët e kësaj kompanie, Elhami Haziri, Enver Berisha dhe Ymer Kurtolli, të cilëve iu kishte kërkuar 20 mijë euro ryshfet, duke i thënë se këtë shumë të parave po e kërkonte i akuzuari Latifi.

Por, pasi i dëmtuari Haziri i kishte thënë që nuk e kishte këtë shumë, të njëjtit kishin arritur të merren vesh që për fillim të japin 10 mijë euro, ku në atë moment sipas prokurorisë, i akuzuari Bilalli i kishte shkruar të akuzuari Latifi “nuk po lëshon veç 10”, dhe më pas më 29 qershor 2021, i akuzuari Bilalli ishte takuar me të dëmtuarin Haziri.

Sipas prokurorisë, të dy ishin takuar në restorant “Garden”, në Gjilan, dhe pasi i dëmtuari Haziri i kishte dhënë 8 mijë euro, kishte kërkuar nga i akuzuari Bilalli të kontaktojë të akuzuarin Latifi për tu bindur se ky i fundit e kishte marrë vesh se paratë janë dhënë.

Pas kësaj, prokuroria po pretendon se duke u zbatuar masat e fshehta dhe nën vëzhgim të policisë, i akuzuari Bilalli në prezencë të të dëmtuarit Haziri i kishte telefonuar të akuzuarit Latifi duke i thënë “kreva punë dhe tash po eci”.

Sipas aktakuzës, i akuzuari Bilalli shumën prej 8 mijë euro e kishte pranuar në një zarf dhe ishte nisur në drejtim të Prishtinës, ku rrugës ishte ndaluar nga policia të cilën ia kishin gjetur shumën prej 8 mijë euro dhe ia kishin sekuestruar.

Për këto veprime, dy të akuzuarit po ngarkohen për veprën penale “Marrja e ryshfetit”, nga neni 421, paragrafi 1, lidhur me nenin 31 të Kodit Penal, vepër kjo e dënueshme me gjobë dhe me burgim prej një deri në tetë vjet.

Afati i fundit për regjistrime në programin MSc. Data Science & Analytics në UNI – Universum International College – Powered…

Sponsoruar