Lajme

Kurti nuk lëshon pe para BE-së: Reciprociteti, parim i shtetit të Kosovës!

Autori: Gazeta inFokus 14:32 | 07 Tetor 2021

Albin Kurti përsëriti para përfaqësuesit të lartë të BE-së për politikën e jashtme dhe sigurinë, Josep Borell se reciprociteti do të jetë parimi mbi të cilin do të mbështeten veprimet e shtetit të Kosovës.

Takimi i tij me Borell u zhvillua në Bërdo të Sllovenisë, në një pauzë të samitit BE-Ballkani Perëndimor. Sipas deklaratës së lëshuar nga zyra e kryeministrit të Kosovës, Borrell e ka mirëpritur marrëveshjen mes Prishtinës e Beogradit për targat e automjeteve dhe shtoi se kjo “do të duhej të shërbente si një moment i ri për të përshpejtuar arritjen e një marrëveshjeje përfundimtare” mbi normalizimin e marrëdhënieve.

Në 30 shtator, Kosova dhe Serbia, nën ndërmjetësimin e bllokut europian arritën ujdinë që synonte shtensionimin e situatës në veri të Kosovës. Paraprakisht, banorët serbë atje kanë bllokuar dy vendkalimet kufitare me Serbinë-Jarinjën dhe Bërnjakun, në shenjë kundërshtimi ndaj masave të reciprocitetit që ka ndërmarrë Kosova ndaj automjeteve me targa të Serbisë. Në 20 shtator, Qeveria e Kosovës kishte marrë vendim që shoferët e makinave me targa të Serbisë, t’i zëvendësojnë ato me targa të përkohshme gjatë kohës që udhëtonin në Kosovë.

-Advertisement-

Masa të ngjashme për makinat me targa të Kosovës, Serbia kishte 10 vjet që i zbatonte. Kurti dhe Borrell në fund “u pajtuan se dialogu është platforma përmes së cilës palët arrijnë t’i zgjidhin çështjet e pazgjidhura”.