Vaksinimi masiv në vend ka filluar qysh nga 14 qershori e megjithatë me dozën e dytë të vaksinës antiCOVID-19 janë vaksinuar vetëm 541 mijë e 431 qytetarë.

Ani pse në planin shtetëror masiv të vaksinimit parashihej që ky numër i qytetarëve të vaksinoheshin vetëm për 1 muaj.

Tani kur jemi afër fundit të vitit është një numër jo i vogël i qytetarëve që janë vaksinuar vetëm me dozën e parë dhe ende nuk e kanë marrë të dytën. Kjo shifër ka arritur në 802 mijë e 225 persona.

-Advertisement-

Gazeta Infokus në lidhje me këtë ka kontaktuar me Ministrinë e Shëndetësisë për të parë se pse një numër kaq i madh i qytetarëve ende nuk e kanë marrë edhe dozën e dytë të vaksinës.

Të pyetur nëse pas vaksinimit me dozën e parë qytetarët nuk po shprehin më interesim për të marrë edhe dozën e dytë, ministria e ka mohuar këtë ani pse shifrat e vaksinimit flasin ndryshe.

“Zakonisht, ata që marrin dozën e parë, i përmbahen termineve dhe paraqiten për ta marrë edhe dozën e dytë të saj. Termini për dozën e dytë u shkruan në kartelën  e vaksinimit, në momentin që marrin dozën e pare. Qytetaret e shtyjnë afatin vetëm kur janë duke përdorur ndonjë lloj terapie apo për ndonjë arsye tjetër, por zakonisht , ata paraqiten për dozat e dyta” është thënë në përgjigjen e zyrës për komunikim të MSh-së.

E megjithatë nga kjo zyrë e kanë pranuar se ka raste kur qytetarët kërkojnë mirëkuptim në vonesat për të marrë dozën e dytë, e sipas tyre marrja e dozës së dytë tolerohet të shtyhet në disa raste.

“Ka prej atyre që kërkojnë mirëkuptim kur vonohen për ndonjë dite, por kjo mirëkuptohet dhe vaksinohen, për me tepër qe edhe marrja e dozës se dytë tolerohet të shtyhet në raste të caktuara. P.sh te Astra Zeneca distanca midis dozës se parë dhe të dytë është prej javës së 4-12, te Pfizer prej 21-28 dite”, thuhet në përgjigjen e tyre.

Numri në total i personave të cilët janë vaksinuar edhe me dozën e dytë edhe me të parën është mbi 1 milionë e 343 mijë.

Sipas ekspertëve shëndetësorë një person nuk konsiderohet i imunizuar nëse nuk e ka marrë edhe dozën e dytë të kësaj vaksine.

E një gjë të tillë po e thotë edhe infektologu Ilir Tolaj. Sipas tij një person nuk konsiderohet i imunizuar nëse nuk ka marrë edhe dozën e dytë të vaksinës anticovid dhe efekti në këto raste është vetëm 35 deri në 40%.

“Jo, personi vetëm më një dozë të vaksinës nuk konsiderohet i imunizuar. Përjashtim bëjnë ata të cilët e kanë kaluar në mënyre të dokumentuar infeksionin natyror. Tek këta persona mjafton marrja e vetëm një doze të vaksinës. Të tjerët duhet ti marrin dy doza. Edhe ata të cilët nuk mund ta dokumentojnë se e kanë kaluar infeksionin në mënyre të natyrshme, duhet të vaksinohen me dy doza. Një doze e vaksinës mbron në përqindje rreth 35-40% nga infeksioni, dy doza në përqindje 85 -95%”, ka thënë ai për Infokus.

Derisa në botë është filluar të flitet edhe për dozën e tretë në mënyrë që imunizimi të zgjasë dhe të efekti i mbrojtjes të jetë më i madh në Kosovë një numër i madh i qytetarëve ende nuk e kanë marrë as dozën e dytë e shumë prej tyre nuk kanë marrë as të parën./Gazeta Infokus/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-