Sport

⚽️ Fjalët e Bunjakit për rastin e Xhakës

Autori: Gazeta inFokus 18:52 | 03 June 2017

Trajneri i Kosovës, Albert Bunjaki, tregohet diplomat dhe nuk kërkon të përfshihet në përplasjen më të fundit mes teknikut të Kombëtares shqiptare, Xhani De Biazi dhe mesfushorit kosovar të kuqezinjve, Taulant Xhaka. Pas përplasjes mes të dyve në mars, dy ditë më parë erdhi edhe vendimi i De Biazit për të mos e grumbulluar Xhakën për dy ndeshjet e radhës së kuqezinjve.

I pyetur në lidhje me këtë çështje, trajneri i Kosovës, në një prononcim për “Panorama Sport” përgjigjet: “Nuk është çështja ime që të përgjigjem për këtë pyetje. Megjithatë, them që edhe lojtarët duhet të respektojnë vendimet e trajnerit”. I pyetur për faktin se Xhaka ishte nga ata lojtarë që zgjodhi Shqipërinë përpara vendlindjes, Kosovë, dhe Bunjaki përgjigjet:

“Nuk kam shumë njohuri dhe nuk e di se çfarë ka ndodhur. Sa i përket zgjedhjes, si Taulanti apo edhe lojtarët e tjerë, si Berisha, Mavraj etj., nuk kanë pasur më mundësi të luajnë me Kosovën, pasi morën pjesë në Europian. Kështu që ky është një kapitull i mbyllur për ta”.

Si trajner së jashtmi, si e gjykoni faktin që një lojtar kampion i dyfishtë në Zvicër, me minutazh të plotë, të lihet jashtë Kombëtares? “Ka edhe lojtarë apo raste si për shembull në Kombëtaren e Islandës apo kombëtareve të tjera kur lojtarë akoma edhe më të mirë janë lënë jashtë ekipit përfaqësues për shkaqe të ndryshme”, ka thënë trajneri i Kosovës.

-Advertisement-

Ndërkaq, në lidhje me ndeshjen e radhës që përfaqësuesja kosovare do të luajë ndaj Turqisë, Bunjaki shprehet: “Gjendja është shumë e mirë dhe përgatitjet presim të jenë si zakonisht. Tashmë shumica e futbollistëve janë në Prishtinë. Pjesa më e madhe e tyre kanë qenë aktivë me skuadrat e tyre në fundkampionate, përveç atyre që kanë pasur ndonjë shqetësim fizik.

Normalisht që na duhet kohë për të marrë rezultatet e dëshiruara, sepse janë dy faktorë që domosdoshmërisht kanë ndikuar në paraqitjen tonë. E para nuk kemi pasur fare përvojë si përfaqësuese e po ashtu as futbollistët. Nuk kanë përvojën e duhur sepse shumica prej tyre janë të rinj, por që po piqen. Prandaj ndeshjet që kemi zhvilluar normalisht që kanë pasur efektin e tyre dhe nga ndeshja në ndeshje loja jonë ka ardhur duke u rritur”, ka përfunduar prononcimin e tij Bunjaki.

Subscribe në YouTube: GAZETA INFOKUSI