Disa zyrtarë, mjekë dhe shkencëtarë kroatë kanë paralajmëruar ditët e fundit se interesi për vaksinimin kundër COVID-19 në Kroaci është në rënie, megjithëse janë ende larg arritjes së imunitetit kolektiv, madje edhe nga plani i qeverisë për të vaksinuar të paktën 50-55% të popullsisë së rritur deri më 1 korrik.

Deri më 25 qershor, vetëm rreth 30% e popullsisë së rritur në Kroaci është vaksinuar plotësisht, përkatësisht rreth 25% e totalit, ndërsa imuniteti kolektiv kërkon 85% të popullsisë së përgjithshme, transmetojnë mediat kroate.

Nga fillimi i pandemisë deri më sot, pas suksesit fillestar në valën e parë, Kroacia u rendit e 17-ta me shkallën më të lartë të vdekshmërisë nga COVID-19 me rreth 2.000 vdekje për një milion banorë, gjë që e bëri më keq se disa nga vendet më të prekura si SHBA, Britania e Madhe dhe Meksika.

Ditët e fundit, kryeministri Andrej Plenkoviq, ministri i Shëndetësisë Vili Berosh, epidemiologu Bernard Kaiq dhe shefi i stafit të krizave të spitalit të Dubravës, Bruno Barshiq, kanë folur për problemin e përgjigjes së dobët ndaj vaksinimit.

“Të dashur bashkëqytetarë, mos u mashtroni nga kjo qetësi e lehtë në epidemi. Lloje të reja të virusit po përgjojnë qoshet, dhe sapo të munden, ato do të na sulmojnë përsëri juve dhe mua!”, tha Beros në një letër të hapur, duke shtuar se vaksinimi është përgjegjësi e të gjithëve në Kroaci.

Në mbledhjen e qeverisë, Plenkoviq shprehu pakënaqësinë me faktin se numri i njerëzve të vaksinuar me dozën e parë është rritur me vetëm një për qind në javën e fundit. Përkatësisht, shumica e vaksinave të ndara në këtë periudhë është përdorur për rivaksinimin e atyre që tashmë ishin vaksinuar me dozën e parë.

Epidemiologu Bernard Kaiq ndërkaq tha se “ndoshta nuk është e mundur të parandalohet vala e katërt” në vjeshtë, por se “numri i pacientëve do të varet nga mbulimi i vaksinimit dhe sa shpejt do të përhapet”.

Ndërsa, Bruno Barshiq paralajmëroi se mund të pritet një fund i sezonit turistik nëse përqindja e të vaksinuarve nuk rritet shpejt në më shumë se 60 për qind.

“Këtë vit kemi Britaninë e Madhe ku varianti delta po rritet me shpejtësi dhe është e sigurt se do të vijë në Kroaci. Nëse duam një mbrojtje të denjë, më shumë njerëz duhet të vaksinohen,” tha ai, duke kujtuar se situata epidemiologjike nuk është e mirë sa vitin e kaluar, kur nuk kishte pacientë me koronavirus në spitalin e Dubravës.

BKT Kosova nderohet me tre Çmime prestigjioze për qëndrueshmëri

Sponsoruar