Lajme

Zenun Pajaziti kandidat i PDK-së për kryetar të Gjilanit

Autori: Gazeta inFokus 14:13 | 20 August 2017

Partia Demokratike e Kosovës ka vendosur që për kryetar të Gjilanit ta kandidojë Zenun Pajazitin. Këtë e ka konfirmuar vetë Pajaziti përmes një postimi në Facebook.

“Të nderuar bashkëqytetarë të Gjilanit, unë mbrëmë kam marrë përgjegjësi dhe jam nderuar nga Kryesia e Degës së PDK-së në Gjilan e cila unanimisht ka vendosur që unë të jem kandidat për kryetar të Gjilanit”, ka shkruar Pajaziti.

Për këtë ai ka thënë se është një përgjegjësi që e ka pranuar menjëherë, sepse, siç ka thënë ai, ka dëshirë të shërbejë dhe të japë kontributin e tij direkt përmes qeverisjes lokale në qytetin e vet.

-Advertisement-

Kandidimin e vet Pajaziti e sheh si dalje nga izolimi, duke thënë se qytetarët e kësaj komune nuk e kanë merituar një qeverisje të tillë siç është bërë deri më tani. Për katër vjet këtë komunë e ka qeverisur kryetari Lutfi Haziri (LDK).

“Më 22 tetor do t’i japim fund periudhës së izolimit të Gjilanit dhe Anamoravës. Qytetarët e Gjilanit nuk e kanë merituar këtë trajtim dhe nëpërkëmbje. Do të punoj pa u ndalur asnjë moment, që Gjilani dhe Anamorava të fuqizohen dhe zhvillohen sa më shumë sepse qytetarët tanë janë më punëtorët dhe kanë traditë të punës”, ka shkruar më tej Zenun Pajaziti.

“Deri më 22 Tetor unë dhe ekipi i Partisë Demokratike do të jemi të angazhuar që të hartojmë platformën qeverisëse bashkë me qytetarët, nga bashkëbisedimet në secilën lagje të qytetit dhe në të gjitha fshatrat tona, në mënyrë që propozimet e qytetarëve të bëhen pjesë e programit qeverisës për katër vitet e ardhshme”, ka përfunduar ai.

Subscribe në YouTube: GAZETA INFOKUSI