Lajme

Zemaj: Qeveria Kurti ka dështuar në menaxhimin e shëndetësisë

Autori: Gazeta inFokus 15:41 | 28 October 2022

Ish-ministri i Shëndetësisë nga Lidhja Demokratike e Kosovës, Armend Zemaj, deklaroi të premten se Qeveria Kurti ka dështuar në menaxhimin e sektorit të shëndetësisë.

Në një konferencë për media, Zemaj tha se duhet të bëhen intervenime të shpejta në përmirësimin e gjendjes.

“Intervenimet duhet të bëhen të shpejta sidomos në furnizim me barna, me material shpenzues, por ligji i pagave, ofrimi i pagave të dinjitetshme për profesionistët shëndetësor, mjekët dhe infermierët por edhe stafin tjetër, nëse nuk bëhet me kohë të shpejtë dhe reale atëherë do të kemi vitin e ardhshëm pothuajse një emergjencë humane profesionale në këtë sektor”, u shpreh deputeti i LDK-së.

-Advertisement-

Ai përmendi si shqetësim moslëvizjet në drejtim të krijimit të fondit për sigurime shëndetësore, mungesën e furnizimit me barna nga lista esenciale, dhe listat e gjata të pritjeve të pacientëve për të marrë shërbime.

“Dorëheqja edhe e një ministri dhe caktimi i një ekipi ekzekutiv për menaxhim të shëndetësisë tregon që kryeministri dhe kjo qeveri e ka pranuar dështimin e tij në këtë sektor. Se Qeveria Kurti ka dështuar në menaxhimin e shëndetësisë flasin edhe shifrat e investimeve kapitale në këtë fushë. Vetëm 5% e investimeve kapitale në shëndetësi janë realizuar gjatë këtij viti. Kjo është një mesatare edhe më e tmerrshme sesa mesatarja prej 10% e realizimit të investimeve nga të gjitha ministritë e vendit. Vetëm 530 mijë e 702 euro nga 10 milion e 63 mijë euro të zotuara janë shpenzuar për projekte nga Ministria e Shëndetësisë. Në këtë ministri nga 15 projekte kapitale që janë paraparë me ligjin e buxhetit kanë filluar vetëm dy dhe ato janë vetëm në fazën iniciuese të saj”.

Zemaj shtoi se Qeveria Kurti e ka zvogëluar buxhetin për shëndetësi afër 15% derisa ka shtuar se largimi i profesionistëve shëndetësorë po bëhet për shkak të pagave të ulëta dhe trajtimit jo të mirë të tyre.

Ai potencoi se për nëntë muaj të këtij viti janë larguar 180 mjekë.

Subscribe në YouTube: GAZETA INFOKUSI
E PREMTJA E BARDHË NË ETC ME ZBRITJE DERI 50%
-Advertisement-

Të tjera

Fokusi

lajme