Fokus

Zbulohet loja e Edi Ramës dhe Armend Zemajt me vaksinat për mjekët kosovarë në Shqipëri

Autori: Doresa Geci 16:45 | 16 March 2021

Dy mjekë nga Kosova të martën u kthyen të zhgënjyer nga Shqipëria, ku shkuan të marrin vaksinën e premtuar anti-COVID.

Kjo për shkak se Ministria e Shëndetësisë në Kosovë ende nuk ka dorëzuar një listë të mjekëve të cilët do të vaksinohen atje.

Këtë e ka konfirmuar për Gazetën Infokus, kryetari i Federatës e Sindikatave të Shëndetësisë së Kosovës, Blerim Syla.

Syla ka thënë se një gjë e tillë po ndodhë për shkak të neglizhencës së Ministrisë së Shëndetësisë.

“Arsyet janë shumë të thjeshta, Ministria e Kosovës nuk e ka kryer punën e vetë, nuk e ka dorëzuar listat komfor kërkesave që ka pas Ministria e Shqipërisë dhe normalisht atje nuk munden me dhanë vaksina veç pse dikush po shkon. Ministria e jonë ka qenë neglizhente ndaj kësaj çështje”, ka thënë Syla për Gazëtën Infokus.

E nga Ministria e Shëndetësisë thonë se janë duke pritur nga qeveria e Shqipërisë një shkresë zyrtare se mjekët e Kosovës mund të vaksinohen në Shqipëri.

“Deri tani shkresë zyrtare për vaksinim të personelit shëndetësor kosovar në Shqipëri nuk ka pasur, përveç kontakteve telefonike midis ministrave dhe faktit që MSh ka mirëpritur këtë gjest të Qeverisë së Republikës së Shqipërisë”, thuhet në përgjigjet e MSH-së për Gazetën Infokus.

Mirëpo, sipas Sylës këto janë fjalë koti të Ministrit në detyrë të Shëndetësisë, Armend Zemaj, pasi që nuk ka nevojë për këto protokolle.

“Pse a po dufka me pas edhe shkresë zyrtare për me ia shpetu jetën dikujt a?.Po këto janë pallavra Ministrit Zemaj dhe kësaj Qeveri. Ne jemi dy shtete vëllezër dhe motra dhe nuk duhet ato protokolle”, u shpreh ai.

Derisa nga MSH thonë që janë në pritje të listës se mjekëve të cilët dëshirojnë të vaksinohen, listë të cilët do ta përgatisë, Shërbimi Spitalor dhe Klinik Universitar i Kosovës.

“MSh ka kërkuar nga SHSKUK-së që të përgatisin listën e personelit shëndetësor që dëshiron te vaksinohet në Shqipëri vullnetarisht, një numër simbolik sa është ofruar nga Shqipëria. Pra, varet edhe nga vullneti i personelit shëndetësor, me që vaksina ka efekte preventive, por ligjërisht jo e detyrueshme, se paku deri tani”, kanë deklaruar nga MSH.

Kujtojmë që Kryeministri Edi Rama i bëri thirrje mjekëve të Kosovës të vijnë për të marrë vaksinën në Kukës në pamundësi, sikurse e parashikon kontrata e blerjes për të dërguar një sasi në Kosovë.

E nga MSH-ja kanë thënë se më në fokus e kanë që vaksina të vijë në Kosovë.

“MSh nuk ka refuzuar ketë ndihmë simbolike, por është e kuptueshme që fokusi është qe vaksinimi te filloje sa me parë në Kosovë”, kanë deklaruar nga MSH-ja./Gazeta Infokus/

Të tjera