Lajme

Ymeri: Lista Serbe përfaqëson Beogradin në Kosovë dhe jo serbët e Kosovës

Autori: Gazeta inFokus 13:37 | 19 June 2017

Kryetari i Vetëvendosjes ,Visar Ymeri, ka thënë se vullneti i votuesve serb të Kosovës është deformuar nga strukturat e Serbisë dhe Lista Serbe.

Ymeri ka thënë se presioni mbi qytetarët serb ka filluar qysh para fushatës zgjedhore e deri pas përfundimit të votimit, transmeton Infokusi.com

Ai ka përmendur disa raste te presionit mbi qytetarë për të votuar Listën Serbe prandaj kjo listë ka deformuar vullnetin e qytetarëve serbë të vendit tonë, duke përfaqësuar Beogradin në Kosovë dhe jo serbët e Kosovës ka përfunduar Ymeri

-Advertisement-

Postimin e plotë të Ymerit bërë në rrjetin social “facebook” mund ta gjeni më poshtë:

“Në zgjedhjet e 11 qershorit, vullneti i votuesve serbë të Republikës së Kosovës është deformuar përmes presionit nga strukturat e Serbisë dhe Lista Serbe. Fillimisht kjo është bërë mbi partitë tjera lokale serbe, duke detyruar që të tërhiqen nga gara, siç ishte rasti me një parti, e cila ka tërhequr listën e kandidatëve nga zgjedhjet pas presionit nga Beogradi. Ndërkaq, Partia Liberale e drejtuar nga Sllobodan Petroviq nuk kishte bërë fare fushatë parazgjedhore, si pasojë e kërcënimit të hapur nga Lista Serbe mbi mbështetësit e tij se do të largohen nga puna.

Edhe gjatë heshtjes zgjedhore, madje edhe në ditën e zgjedhjeve, nëpër programet e ndryshme të kanaleve televizive të Serbisë që ndiqen masivisht nga serbët në Kosovë, janë ftuar hapur serbët që të votojnë për Listën Serbe.

Më tej, përmes komisionerëve e zyrtarëve zgjedhorë në komunat veriore, praktikisht vetëm Lista Serbe ka pasur anëtarët e saj në komisione, duke bërë kështu që të ketë kontroll të plotë në vendvotime dhe të organizojë dhe zbatojë skemën e votimit vetëm për Listën Serbe, pa u vërejtur dhe pa u denoncuar.

Kontrolli mbi votuesit është shtrirë nga sjellja kundërligjshëm e 4.000 aplikacioneve për t’u regjistruar si votues, ardhja e dhjetëra autobusëve nga Serbia për të votuar për Listën Serbe, presioni mbi votuesit e kontrolli i tyre deri në atë masë sa një mjek nga Shtërpca kishte lëshuar mbi 150 diagnoza të falsifikuara, si kusht për të votuar nga shtëpia, e tërë kjo si mënyrë e kontrollimit të votuesve.

Lista Serbe jo vetëm që përfaqëson Beogradin në Kosovë dhe jo serbët e Kosovës, por ajo edhe e ka deformuar vullnetin e qytetarëve serbë të vendit tonë.”/INFOKUSI

Subscribe në YouTube: GAZETA INFOKUSI