Gjenerali amerikan Wesley Clark ka reaguar pas vendimit të Gjykatës Speciale në Hagë ndaj ish-krerëve të UÇK-së, duke shprehur habinë dhe kundërshtimin e tij ndaj dënimeve.

Clark, ish-komandant suprem i NATO-s gjatë luftës në Kosovë, tha se gjatë kohës së konfliktit ka pasur kontakte me Hashim Thaçin dhe se ka dëshmuar edhe në procesin gjyqësor. Sipas tij, nga ajo që ka parë gjatë luftës dhe nga bashkëpunimi me UÇK-në, nuk ka parë prova që, sipas tij, të justifikonin një dënim për krime lufte.

“Jam i shokuar dhe i zemëruar. Unë e njoh Thaçin dhe shokët e tij dhe të gjithë ata që kanë bërë luftën. Unë kam dëshmuar në gjyq kam thënë se çfarë kam parë dhe e dija se çfarë po ndodhte në Kosovë dhe bashkëpunimin tonë me UÇK-së dhe nuk kam parë asnjë dëshmi që të justifikojë këtë lloj vendimi.

-Advertisement-

Fatkeqësisht Gjykata e dha vendimin e vet dhe kjo do të jetë një rrugë e vështirë në të ardhmen. Me aq sa di, këto dëshmitë sekrete që edhe vetë nuk më treguan asnjë dëshmi nga prokuroria, nuk do të më bënin dhe që të ndryshonin mendimin tim. Unë jam takuar tre herë me Hashim Thaçin gjatë konfliktit dhe në Rambuje”, tha ai.

Clark foli gjithashtu për situatën në Kosovë gjatë luftës, duke e cilësuar konfliktin si një rebelim kundër regjimit të atëhershëm serb. Ai tha se gjatë asaj periudhe kishte pasur edhe krime individuale dhe tensione të forta mes shqiptarëve dhe serbëve.

“Sigurisht e takova atë kur isha në Kosovë, por UÇK-ja dhe ajo çfarë po ndodhte atje ishte një rebelim kundër një regjimi autoritar dhe jo vetëm një regjim autoritar, por edhe shumë krime individuale të kryera nga serbë individualë përkundër fqinjëve të tyre shqiptarë”, tha Clark.

Deklaratat e Wesley Clark vijnë pas vendimit të Gjykatës Speciale, e cila shpalli fajtorë ish-krerët e UÇK-së për vepra të caktuara penale të lidhura me konfliktin në Kosovë. Reagimi i Clark paraqet qëndrimin e tij mbi procesin dhe mbi rolin që, sipas tij, kishte Hashim Thaçi gjatë luftës.

Udhëto Oslo – Prishtinë çdo javë me PrishtinaTickets

Sponsoruar

-Advertisement-