Me një prej punëve që më së shumti është krenuar Lëvizja Vetëvendosje në fillim të mandatit qeverisës në Prishtinë, ka qenë bllokimi i ndërtimeve dhe ndalja e dhënies së lejeve të reja.

Të gjithë e mbajnë mend kryetarin Shpend Ahmeti, i cili krenohej në vitin 2014, se sa pak leje ndërtimi kishte dhënë Komuna e Prishtinës, duke thënë se lejet e shumta të ndërtimit janë burim korrupsioni.

Gjithashtu, Ahmeti deklaronte se ndërtimi masiv ishte në kundërshtim me kushtet urbanistike dhe dëmtonte cilësinë e jetës së prishtinasve, duke e paraqitur këtë si një prej problemeve kryesore të qeverisjes së mëparshme të Prishtinës.

Mirëpo, ndryshe nga perceptimi publik që u krijua në fillim, realiteti është ndryshe për vitet e më pasme.

Të dhënat zyrtare të Komunës së Prishtinës tregojnë se në vitin e parë të qeverisjes së Ahmetit u dhanë vetëm 83 leje për 228,882 metra katrorë ndërtim, mirëpo në vitin 2015 lejet u dyfishuan dhe u dhanë 158 leje ose u dhanë leje për 594,722 metra katrorë ndërtim.

Sasia e madhe e lejeve dhe e ndërtimeve të egra është bërë shqetësim edhe për qytetarët, duke u bërë kështu edhe subjekt emisionesh dhe reportazhesh mediale.

Një investigim i bërë më herët nga Kallxo.com, nxjerr në pah se shumë leje për ndërtime të reja bien ndesh me planin zhvillimor urban të Prishtinës dhe zaptojnë hapësira që ishin parashikuar për gjelbërim.

Ky plan ka përcaktuar kushte e kritere specifike për ndërtimet e reja, të cilat ekspertët po thonë që nuk janë respektuar.

Edhe pse kryetari Ahmeti e ka kritikuar vazhdimisht paraardhësin e tij, Isa Mustafa, për masivitetin e lejeve të dhëna, në vitin 2016 si vit i parafundit qeverisës i Ahmetit, Komuna e Prishtinës ka dhënë leje shumë më tepër se në vitin 2012, që ishte viti i parafundit qeverisës i Mustafës.

Në vitin 2012, Komuna e Prishtinës e qeverisur nga Isa Mustafa ka dhënë 100 leje ndërtimi për një sipërfaqe ndërtimi prej 247,867 metra katrorë. Ndërsa, në vitin 2016, përkatësisht në vitin e parafundit të qeverisjes së Ahmetit, Komuna e Prishtinës ka dhënë 158 leje për një hapësirë dyfish më të madhe prej 515,637 metra katrorë.

Nga përfaqësuesit e ndërtimtarëve, Ahmeti ishte akuzuar më herët se lejet për ndërtime po i jepte në mënyrë selektive, duke i favorizuar grupet e interesit të afërta me Vetëvendosjen, derisa protestuesit e sektorit të ndërtimit në Prishtinë para disa kohësh edhe ishin fyer nga udhëheqësit e Prishtinës, duke i quajtur ata mafioz. /Lajmi.net/

Marsi sjell Magji në ETC

Sponsoruar