Lajme

Vuçiq: Prishtina kërkon të na fusë në konflikt duke na quajtur shërbëtorë rusë

Autori: Gazeta inFokus 11:17 | 23 March 2022

Presidenti i Serbisë, Aleksandar Vuçiq, ka thënë se kryeministri i Kosovës Albin Kurti dëshiron që të shkaktojë trazira për ta destabilizuar rajonin.

“Është e jona që të mos biem në grackë dhe qëllimi i Albin Kurtit është të shkaktojë trazira dhe destabilitet në rajon. Më e lehtë do të ishte të pranonim të gjitha kushtet e tyre, por çfarë do të bëjmë më 4 prill, një ditë pas zgjedhjeve?”, tha Vuçiq në televizionin serb “Pink”.

Ky deklarim i Vuçiqit vjen një ditë pasi u zmbraps nga mbajtja e zgjedhjeve presidenciale dhe parlamentare të 3 prillit edhe në Kosovë, me kushtet e vendosura nga Kosova.

-Advertisement-

Ai deklaroi se për lejimin e mbajtjes së këtyre zgjedhjeve në Kosovë, Prishtina ka kërkuar nga Serbia që de facto ta njohë pavarësinë e Kosovës çka për ta nuk është e pranueshme, derisa ka treguar se për serbët e Kosovës do të ketë vendvotime të veçanta në komunat fqinje në Serbinë qendrore.

I pari i Serbisë, në këtë intervistë, ka paralajmëruar se bota do ta shohë një konflikt edhe më të madh dhe më të ashpër në fund të vitit se ai që po ndodh aktualisht në Ukrainë.

Madje, presidenti serb thotë se parashikoi dhe paralajmëroi liderë të shumtë botërorë për atë që po ndodh tash në Ukrainë.

“Më pëlqen të udhëhiqem nga faktet, e quaj logjika e përcaktorëve të hekurt. Siç e parashikova konfliktin në Ukrainë, besoj se deri në fund të vitit do të ketë një konflikt më të madh. Do të doja të isha gabim”.

Subscribe në YouTube: GAZETA INFOKUSI