Lajme

Vuçiq: Darka e mbrëmshme me Kurtin dhe Lajçakun ka qenë shumë e vështirë

Autori: Gazeta inFokus 13:20 | 05 May 2022

Këto deklarata ai i bëri pas takimit të tij me kryeministrin e Kosovës, Albin Kurti dhe ndërmjetësuesin e Bashkimit Evropian për dialogun, Miroslav Lajçak.

Sipas tij, përfaqësuesit gjermanë kanë insistuar që ajo që është nënshkruar në Bruksel mes dy vendeve duhet të zbatohet, raporton Tanjug.

I pyetur nëse mund të zbulojë disa detaje nga ai takim dhe nëse ka pasur ndonjë përparim, Vuçiq është përgjigjur se nuk i pëlqen të flasë për detaje, por se biseda ka qenë “shumë, shumë e vështirë”.

Ndryshe të mërkurën Kurti ka zhvilluar takim me Vuçiqin në një darkë joformale në Berlin.

Kjo darkë pasoi takimet e ndara të tyre me kancelarin gjerman Olaf Scholz në të cilat u diskutua bashkërendimi i reagimeve të mëtejshme ndaj agresionit rus në Ukrainë si dhe bashkëpunimin rajonal.

Kancelari Scholz kishte ftuar në Berlin të dërguarin e BE-së për bisedimet Kosovë – Serbi, Miroslav Lajçak. Takimit i ishte bashkuar edhe i dërguari i Gjermanisë për Ballkanin Perëndimor, Manuel Sarrazin.

Scholz tha pas takimit me kryeministrin e Kosovës Albin Kurti, se një marrëveshje për normalizimin e marrëdhënieve Kosovë – Serbi do të hapte rrugën për integrimin e të dyja vendeve në Bashkimin Evropian.