Kosova këtë vit është ballafaquar me një rritje shqetësuese të vrasjeve , sidomos ato raste kur viktimat dhe kryesit e këtij krimi janë të mitur.

Rasti i tillë ishte ai i pak ditëve më parë në kryeqytet ku një i mitur goditi me thikë shokun e tij duke i shkaktuar lëndime vdekjeprurëse, apo rasti i pak javëve më parë ku dy të mitur dyshohen të ketë kryer vrasjen e shokut të tyre po ashtu i mitur, shkruan Infokusi.com

Sipas Policisë së Kosovës gjatë periudhës janar-nëntor të këtij viti në Kosovë kanë ndodhur gjithsej 24 vrasje. Në 18 raste janë zbuluar kryesit e këtij krimi ndërsa 6 raste të tjera janë ende duke u hetuar.

-Advertisement-

Eksperti i sigurisë, Burim Ramadani në një prononcim për portalin “Infokusi” ka komentuar numrin e vrasjeve në Kosovë si shqetësues.

“Vrasjet në Kosovë janë shqetësuese, si për nga numri po ashtu edhe për nga niveli i ndëshkueshmërisë ligjore” ka thënë ai.

Tutje Ramadani ka vlerësuar armët ilegale dhe ndëshkueshmëria e ulët janë dy faktorët kryesorë kanë ndikuar në numrin e madh të vrasjeve.

“Mendoj se janë dy faktorë kryesorë: ekzistimi i numrit të madh të armëve ilegale në duart e qytetarëve, dhe një praktikë e ndëshkueshmërisë së ulët për autorët e vrasjeve. Në të dy faktorët, institucionet e Kosovës duhet të angazhohen në mënyrë gjithëpërfshirëse” ka thënë ai.

Policia e Kosovë në statistikat dërguar portalit “Infokusi” ka dhënë shifra rreth numrit të armëve ilegale që janë sekuestruar gjatë këtij viti.

“Policia e Kosovës gjate realizimit te detyrave dhe angazhimeve te saja, gjatë këtij viti (janar-nëntor 2017) ka konfiskuar 1055 armë të llojeve të ndryshme. Policia me anë të fushatave dhe apeleve të drejtuar qytetarëve ka kërkuar në vazhdimësi që të mos përdoren armët me theks të veçante gjatë ahengjeve të ndryshme”.

Ndërsa Eksperti i sigurisë ka thënë se duhet të ekzistoj një program për minimalizimin e armëve ilegale në duart e qytetarëve.

“Numri i armëve të konfiskuar është në rritje, porse gjithsesi duhet të ekzistojë një program i veçantë nacional për reduktimin dhe minimalizimin e armëve ilegale në duart e qytetarëve.” ka thënë Ramdani.
Ai ka folur edhe vrasjet tek të miturit duke thënë se duhet të fuksionalizohet trekëndëshi shkolla-prindër-nxënës për largimin e potencialit të dhunës.

“Vrasjet me armë tek të miturit janë alarmante dhe paraqesin një indikacion për rritjen e nivelit të potencialit të dhunës në Kosovë, sidomos tek gjeneratat e reja. Këtu, sigurisht, rol të rëndësishëm kanë përpos institucioneve të zbatimit të ligjit, edhe shkollat dhe prindërit. Duhet patjetër të funksionalizohet në mënyrë të plotë trekëndëshi shkolla-prindër-nxënës, me qëllimin e angazhimit të përbashkët për largimin e potencialit të dhunës.” ka përfunduar Ramadani.

Gjatë viteve 2008-2017 në Kosovë kanë ndodhur mbi 400 vrasje, ose saktësisht 411 vrasje prej të cilave 91 vrasje janë ende të pazbuluara apo nën hetime ndërsa për 320 vrasje të tjera janë gjetur autorët, shkruan Infokusi.com

Në përqindje gjatë periudhës janar 2008- nëntor 2017 janë zbuluar 77.85% e rasteve te vrasje dhe vrasje e rëndë./INFOKUSI

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-