Lajme

Vrasja në Gjilan dyshohet se ndodhi për shkak të një borxhi, prokuroria kërkon paraburgim për pesë persona

Autori: Gazeta inFokus 17:48 | 09 November 2021

Prokuroria Themelore në Gjilan ka kërkuar masën e paraburgimit prej 30 ditësh për pesë persona të cilët dyshohet se u përfshinë në vrasjen që ndodhi mbrëmjen e së hënës në lagjen Arbëria në Gjilan.

Prokuroria Themelore në Gjilan thotë se deri tek mosmarrëveshja dyshohet se erdhi pas një borxhi në të holla në mes të pandehurve. E ku të pandehurit me dashje kanë privuar nga jeta të ndjerin E.R.

Prokuroria tregon se e gjithë kjo ndodhi afër shtëpisë së të ndjerit. Tutje prokuroria shpjegon se aty u gjuajt shtatë herë me armë zjarri, të shtëna këto që u drejtuan kundrejt njëri tjerrit.

Aty mbeti i plagosur edhe një V.H, i cili është duke u trajtuar në Qendrën Klinike Universitare të Kosovës (QKUK).

“Prokuroria Themelore në Gjilan, Departamenti për Krime të Rënda, ka paraqitur kërkesën për caktimin e masës së paraburgimit, në afat prej 30 ditësh, në Gjykatën Themelore në Gjilan, kundër të pandehurve V.H., E.N., R.I., A.S. dhe B.K., për shkak të dyshimit të bazuar se në bashkëkryerje kanë kryer veprën penale ‘’Vrasja e rëndë’’, nga neni 173 të Kodit Penal të Republikës së Kosovës. Sipas kërkesës, ekziston dyshimi i bazuar se më 08 Nëntor 2021, rreth orës 20:40 minuta, në lagjen ‘Arbëria’, në Gjilan, afër shtëpisë së të ndjerit E.R., pas një mosmarrëveshje rreth një borxhi në të holla në mes të pandehurve, të pandehurit me dashje kanë privuar nga jeta tani të ndjerin E.R., në atë mënyrë që të pajisur me dy lloje të armëve të zjarrit, kanë gjuajtur shtatë (7) herë në drejtim të njërit tjetrit, ku nga shkëmbimi me armë zjarri ka mbetur i vdekur i ndjeri E.R., ndërsa plagë të rënda trupore ka pësuar edhe i pandehuri V.H., i cili ka kërkuar ndihmë mjekësore në QKUK, në Prishtinë”, thuhet në njoftimin e prokurorisë.

Të pandehurit e sipërshënuar me urdhër të prokurorit të shtetit gjenden nën masën e ndalimit 48 orësh.

Të tjera