Azem Vllasi e ka lënë fajtor presidentin serb Aleksandër Vuçiq për situatën e krijuar në Veri, ditëve të fundit.

Avokati dhe ish-politikani kosovar ka thënë në një intervistë për Front Online se i pari serb e destablizon këtë pjesë sa herë i ka punët keq brenda shtetit që drejton, Serbisë.

Në Zveçan të Kosovës, më 29 maj, misioni i NATO-s në Kosovë, KFOR, ndërhyri dhe nga përleshjet me protestues serbë mbetën të plagosur 30 paqeruajtës ndërkombëtarë.

-Advertisement-

“Vuçiqi po instrumentalizon Serbët e pjesës veriore të Kosovës për nevoja dhe interesa të vetat sikur Millosheviqi në kohën e vet. Kurdo që Vuçiqi ka probleme të brendshme, vëmendjen e kthen kah Kosova duke shkaktuar tensione përmes bandave serbe. Kështu i bën shërbim edhe Rusisë e cila haptazi qëndron prapa zhvillimeve të tilla”, u shpreh Vllasi.

Sipas tij, Serbia synon ta ndajë Veriun nga Kosova.

“Synimi i Beogradit është që pjesën veriore ta shkëpus nga sistemi juridik e institucional të Kosovës dhe ta realizon synimin për “Baskësinë e Komunave Serbe” me kompetenca pushteti për Serbët e Kosovës, e të ndërlidhur me shtetin dhe pushtetin e Serbisë”, potencoi Vllasi.

Vllasi shpjegoi kronologjikisht se si rrodhën gjërat.

“Për zhvillime në tri komuna veriore përgjegjsia bie ekskluzivisht te Vuçiqi. Me urdhërin e tij janë tërhjek Serbët në veri nga shërbimi policor. Janë tërhjek kryetarët e katër komunave. Lista Serbe është tërheq nga Kuvendi dhe Qeveria e Kosovës. Jan ndaluar Serbët të dalin në votime për kryetarë të këtyre komunave. Trazirat e djeshme në tri komuna dhe sulmin ndaj policisë dhe KFOR-it i shkaktuan bandat kriminale të dirigjuara nga Beogradi”, tregoi Vllasi.

Si përgjigje ndaj trazirave të fundit në veri të Kosovës dhe lëndimit të 30 pjesëtarëve të misionit të NATO-s në Kosovë (KFOR), në atë pjesë, aleanca veri-atlantike ka marrë vendim për angazhim të Forcës Operacionale Rezervë për Ballkanin Perëndimor, e cila ka qenë në gjendje gatishmërie për angazhim.

NATO-ja e ka bërë të ditur këtë vendim, përmes një postimi në Twitter.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-