Lajme

Vitia në takim me përfaqësuesit e Bankës Botërore, flasin për gjendjen me pandeminë

Autori: Gazeta inFokus 16:48 | 01 April 2021

Ministri i Shëndetësisë i Republikës së Kosovës, Arben Vitia zhvilloi sot një takim virtual me Massimiliano Paolucci, menaxher i Bankës Botërore  për Kosovën dhe për Maqedoninë e Veriut, në rajonin e Evropës dhe Azisë Qendrore dhe përfaqësues të tjerë të këtij misioni.

Kjo u bë e ditur në një njoftim nga MSH-ja ku thuhet se u diskutua edhe për gjendjen me pandeminë, shkruan Gazeta.

Sipas njoftimit ministri Vitia ka falënderuar misionin e Bankës Botërore për gatishmërinë dhe reagimin e shpejtë ndaj nevojave të Kosovës gjatë pandemisë COVID-19 dhe për fleksibilitetin e treguar brenda projekteve ekzistuese midis MSh-së dhe këtij misioni.

Gjatë takimit është biseduar për situatën rreth COVID-19 dhe përgjigjen e përbashkët ndaj sfidave që ka shkaktuar koronavirusi në të gjitha aspektet, si dhe nevojën e lehtësimit të procesit të sigurimit të vaksinave kundër COVID-19 dhe përgjithësisht edhe të forcimit shëndetësor të Kosovës.

Vitia ka siguruar misionin e BB-së se me ekipin e tij është i përkushtuar për të siguruar vazhdimësinë e projekteve të përbashkëta në proces me BB dhe arritjen e objektivave të përcaktuara në to.

Nga ana e tij, Massimiliano Paolucci, ka shprehur përkushtimin e misionit të BB-së që të bashkëpunojmë ngushtë me Ministrinë e Shëndetësisë në realizimin e projekteve, me qëllim të përmirësimit të indikatorëve shëndetësor në Kosovë./Gazeta inFokus/

Të tjera