Lajme

Vetëvendosje kundër heqjes së TVSH-së për produktet bazë: Ulen të hyrat e shtetit

Autori: Gazeta inFokus 12:08 | 30 June 2022

Në seancën e Kuvendit të Kosovës, ku po diskutohet për ngritjen e çmimeve, shefja e Grupit Parlamentar të Vetëvendosjes, Mimoza Kusari-Lila ka thënë se partia në pushtet propozon që të iniciohet projektligji për caktimin e marzhës së fitimit për produktet bazë.

“Ne kërkojmë që të  iniciohet projektligji për caktimin e marzhës së fitimit për produktet bazë, si: drithërat, krypa, produktet e qumështit, vaji e të tjera”, tha Kuari-Lila.

Kusari Lila ka thënë se si parti nuk e përkrahin propozimin e LDK-së për uljen e akcizës në derivate dhe Tatimit mbi Vlerën e Shtuar për produktet esenciale.

Po ashtu ajo ka thënë se me aplikimin e heqjes së TVSH-së do të ndikoheshin të hyrat e shtetit.

“Është e rëndësishme që Kuvendi i Kosovës të trajtojë me seriozitet temat që e prekin qytetarin.

Aktualisht në Kosovë, opozita në Kuvend bojkoton aktivitetin konstruktiv dhe ka propozimet që nuk e ndihmojnë situatën financiare të qytetarëve në Kosovë. Javën e kaluar u përmbyll një cikël i debatit mbi shkatërrimin e Fondit Pensional, duke mos ofruar ide të tjera.

Sa i përket diskutimit të sotëm për reduktimin e akcizës dhe normës së TVSH-së për derivate dhe për produkte esenciale. Është mirë të tregojmë se si kanë performuar të hyrat e shtetit në këtë periudhë. Të hyrat janë rritur.

Masat nga Pakoja e Ringjalljes Ekonomike që kanë filluar në vitin 2021 janë duke u aplikuar në vitin 2022. Me aplikimin e heqjes së TVSH-së do të ndikohen të hyrat e shtetit dhe do të ketë më pak të hyra e rrjedhimisht shpërndarje më të vogël të këtyre të hyrave”, u shpreh Kusari-Lila në seancën e Kuvendit.

Etiketa:

Të tjera

Fokusi

lajme