Presidenti i Shteteve të Bashkuara, Joe Biden, tha të premten se është i gatshëm ta shpallë gjendjen e fatkeqësisë së madhe në Teksas, pasi një stuhi dimërore vdekjeprurëse ndikoi në ndërprerjen e rrymës dhe ujit për miliona banorë.

Shefi i Shtëpisë së Bardhë tha se ky veprim, që erdhi pas kërkesës nga guvernatori i Teksasit, Greg Abbot, do ta hapë rrugën për më shumë ndihma të qeverisë qendrore për përpjekjet e menjëhershme dhe afatgjata të rimëkëmbjes nga dëmi i shkaktuar nga stuhia.

Vetëm në qytetin Austin u raportuan 1 miliard e 230 milionë litra ujë të humbura për shkak të shpërthimit të gypave.

Shtëpia e Bardhë tha më vonë përmes një deklarate se presidenti e thirri në telefon ushtruesin e detyrës së Agjencisë Federale për Menaxhimin e Emergjencave, Bob Fenton, për ta informuar se kreu i Shtëpisë së Bardhë do ta miratojë masën sapo agjencia t’ia dërgojë kërkesën zyrtare.

Përderisa moti i ftohtë në Teksas filloi të përmirësohet, energjia elektrike është duke u kthyer anembanë vendit, por miliona njerëz ende nuk kanë qasje në ujë të sigurt për pije në pjesën jugore të Shteteve të Bashkuara, shkruan The Guardian.

Rreth 370.000 shtëpi ishin pa rrymë deri të premten në mëngjes në Teksas, Louisiana dhe Mississippi, ndërsa miliona njerëz janë këshilluar që ta vlojnë ujin e ujësjellësit para se ta përdorin për pije. Temperaturat shumë të ulëta i dëmtuan gypat dhe infrastrukturën e ujësjellësve në jug të ShBA-së.

Në Teksas, rreth 13 milionë njerëz apo gati gjysma e popullsisë së shtetit është këshilluar ta vlojë ujin para përdorimit, ndërsa nga acari janë prekur mbi 700 sisteme të furnizimit, bëri të ditur Komisioni për Cilësinë e Mjedisit.