Lajme

Veseli: Nga dje Kosova merr një rrugëtim të ri

Autori: Gazeta inFokus 14:21 | 11 May 2017

Kryetari i PDK-së, Kadri Veseli, ka deklaruar të mërkurën se partia që ai drejton është e gatshme të marrë përgjegjësi, e bindur se vendi mund të ecë përpara, ndërsa qeverisja e udhëhequr nga Isa Mustafa nuk ka intensifikuar përpjekjen për vendimmarrje është parë e arsyeshme që të dëgjohej vullneti i qytetarëve.

Ai këto komente i bëri gjatë një vizite që i bëri çerdhes “Mollëkuqja” në Prishtinë, së bashku me Arbana Xharrën, e cila para pak ditsh aderoi në Partinë Demokratike të Kosovës.

I pari i PDK-së me këtë rast foli për situatën politike, pas rënies së Qeverisë së Kosovës dhe shpërbërjes së Kuvendit të Kosovës, duke thënë se vendi nga dje merr një rrugëtim të ri.

-Advertisement-

“Nga dje Kosova merr një rrugëtim të ri. Kam menduar që më e mira që mund të bëj të mos mendoj vetëm për veten, por dhe për qytetarët. Duke parë dëshirën e tyre për ndryshim dhe se qeverisja e udhëhequr nga Mustafa nuk e intensifikonte përpjekjen për vendimmarrje, e pamë të arsyeshme ta dëgjojmë vullnetin e qytetarëve. Tani hapet perspektiva e re. Ka dhe të atillë që synojnë të shembin gjithçka. Në këto rrethana PDK është e gatshme të marrë përgjegjësi, e bindur se vendi mund të ecë përpara”, është shprehur kryetari Veseli.

Duke përkujtuar se pa fuqizimin e grave dhe të rinjve nuk mund të ketë zhvillim të fuqishëm ekonomik në Kosovë, Veseli tha se vendi i nevojitet një fillim i ri për të mirën e qytetarëve dhe perspektivës së tyre.

“Jam në një ambient të veçantë si baba i katër fëmijëve të cilët kanë qenë në çerdhe. Institucioni parashkollor është i rëndësishëm. Investimi më i garantuar është në edukimin e fëmijëve, të krijojmë fëmijë që janë të përgatitur t’i përballojmë sfidat e konkurrencës globale”, ka thënë ai.

Nga ana e saj, Arbana Xharra, ka folur për rëndësinë e çerdheve për edukimin e fëmijëve.

“Të provojmë të punojmë me nder. Kopshti ka shumë rëndësi, se ne duar të kujt i lënë fëmijët. Duhet të merreni seriozisht me fëmijët”, është shprehur ajo.

Subscribe në YouTube: GAZETA INFOKUSI