Lajme

Vendimet e rënda të tre kryetarëve

Autori: Gazeta inFokus 10:12 | 07 July 2017

Tre kryetarë të komunave që kanë arritur të fitojnë mandatin e deputetit në bazë të rezultateve përfundimtare të shpallura nga KQZ, kanë vendosur për postin që do të mbajnë, kryetar apo deputet.

Mimoza Kusari- Lila, kryetare e Komunës së Gjakovës dhe Rasim Selmanaj, kryetar i Komunës së Deçanit kanë vendosur t’i lënë pozitat e tyre të mbajtura deri më tani për tu bërë deputetë të Kuvendit të Kosovës. E ndryshe nga ta ka vendosur kreu i Komunës së Prishtinës, Shpend Ahmeti.

Ahmeti ndonëse ishte në garë për deputetë nga Lëvizja Vetëvendosje, ai në KQZ është deklaruar se do të vazhdojë të mbajë postin e kryetarit të Prishtinës, duke lënë të kuptohet se do të jetë sërish në garë për zgjedhjet lokale të 22 tetorit, raporton Indeksonline.

-Advertisement-

Në nenin 9 të Ligjit për Zgjedhjet Lokale në Republikën e Kosovës, thuhet se: Kandidati i subjektit të certifikuar politik për pozitë të Kryetarit të Komunës mund të certifikohet si kandidat në zgjedhje tjera siç janë ato për Kuvend të Kosovës apo Kuvend të Komunës, por do të mbajë vetëm një pozitë të zgjedhur. Nëse zgjidhet si Kryetar Komune, kandidati nuk do të këtë të drejtë të mbajë vendin në Kuvendin e Kosovës apo Kuvendin e Komunës.

Ndërsa përveç tre kryetarëve që u është kërkuar të deklarohen nga KQZ, janë edhe shtatë asmblistë komunal të cilët kanë vendosur se cilën pozitë do ta mbajnë.

Ligji për Vetëqeverisje Lokale e përcakton qartë edhe mandatin e asamblistit. Neni 37.3 i këtij ligji thotë se anëtari i kuvendit të komunës në të njëjtën kohë nuk mund të jetë deputet i Kuvendit të Republikës së Kosovës./Indeksonline/

Subscribe në YouTube: GAZETA INFOKUSI