Lajme

Vdes një pacient në Klinikën e Psikiatrisë, dyshohet se ia vuri zjarrin vetes

Autori: Gazeta inFokus 09:08 | 24 August 2023

Shërbimi Spitalor Klinik dhe Universitar i Kosovës ka njoftuar se mbrëmë ka ndodhur një zjarr në QKUK, në Repartin e Urgjencës dhe Intensives Psikiatrike.

Sipas njoftimit të tyre, dyshohet se një pacient i ka vënë zjarrin në rrethana të panjohura dhomës së tipit të mbyllur.

“Qendra Klinike Universitare e Kosovës (QKUK), njofton se mbrëmë rreth orës 23:00, në Repartin e Urgjencës dhe Intensives Psikiatrike ka ndodhur një zjarr, në njërën nga dhomat e tipit të mbyllur, ku qëndrojnë pacientët përkohësisht, pacientë në gjendje të agresivitetit dhe agjitimit të theksuar psikomotor, jo koshient për gjendjen mendore”.

-Advertisement-

“Në të njëjtin Repart, në të njëjtën kohë, dyshohet se një pacient i ka vënë zjarrin në rrethana të panjohura dhomës së tipit të mbyllur, me ç’rast si pasojë e ngulfatjes nga tymi (asfiksioni) ai ka humbur jetën, përkundër përpjekjeve maksimale të stafit shëndetësor për ta shpëtuar pacientin”, thuhet në njoftim.

Në njoftim bëhet e ditur se një paciente tjetër ka pësuar shenja të helmimit nga tymi, përcjell Klankosova.tv.

“Gjithashtu gjatë kësaj kohe, një paciente tjetër ka pësuar shenja të helmimit nga tymi, e poashtu e tërë ekipi kujdestare, dy mjekë dhe dy infermiere të cilët gjatë ofrimit të ndihmës për pacientin në fjalë dhe evakuimit të pacientëve të tjerë, kanë manifestuar shenja të helmimit nga tymi dhe kanë marrë ndihmë mjekësore në Klinikën Emergjente. Rasti është duke u hetuar nga njësitet përkatëse të Policisë së Kosovës”.

Subscribe në YouTube: GAZETA INFOKUSI