Lajme

Vdekja e foshnjës nga Covid-19, mjekja thotë u pranua në gjendje të rëndë

Autori: Gazeta inFokus 23:04 | 05 September 2021

Gjatë ditës së djeshme jetën e ka humbur edhe një foshnje 3-javëshe.

Foshnja e gjinisë femërore ishte e infektuar me koronavirus.

Ajo ishte pranuar në Klinikën e Neonatologjisë me datë 28 gusht pas dyshimeve që kishte shprehur pediatri i saj.

Drejtoresha e Klinikës së Neonatologjisë, Hajrie Ismaili thotë se gjendja e foshnjës kur ishte pranuar ishte e rëndë.

“Në momentin që është pranuar në klinikën tonë i është bërë testi dhe ajo është konfirmuar pozitive. Gjendja e foshnjës qysh në fillim që është pranuar ka qenë e rëndë dhe ka kërkuar mbështetje me respiratorë. E kemi vendosur në ventilim mekanik. Në vijim gjendja vazhdimisht ka qenë e rëndë, derisa dje pasdite përkundër kujdesit intensiv ajo ka ndërruar jetë”, ka deklaruar ajo.

Gjendja shëndetësore e nënës së foshnjës sipas Ismailit paraqitet stabile.

“Nga informatat që kemi, del se familja e foshnjës ka qenë e infektuar me koronavirus ndërkohë që edhe foshnja ka rezultuar pozitiv. Gjendja e nënës së foshnjës është stabile. Në testet e dyta familja tashmë ka rezultuar negative në koronavirus, por foshnja edhe në testin e dytë kishte rezultuar pozitive”.

Të tjera