Rasti i 34-vjeçares, Artila Kameri, e cila vdiq pasi dyshohet se ra nga një hotel në Graçanicë, vazhdon të mbetet mister. Rrethanat se si ra nga hoteli, nuk janë zbardhur akoma. Prokuroria thotë se po punon me Policinë për hetimin e këtij rasti, por se informata tjera s’mund të ndajnë për të ruajtur integritetin e hetimeve. Hetimet vazhdojnë…

Në orët e para të mëngjesit të 28 dhjetorit, një grua është gjetur e vdekur poshtë një hoteli në Graçanicë. Viktima është Artila Kameri, një 34-vjeçare nga Gjakova, e cila ishte pronare e një biznesi për rregullimin e thonjve.

Sipas Policisë së Kosovës, dyshimet janë se e njëjta kishte rënë nga kati i dytë i hotelit.

“Graqanicë / 28.12.2023 – 03:23. Njësitet policore pasi kanë pranuar informatën se një person dyshohet se ka rënë nga kati i dytë i një hoteli, kanë dalë në vendin e ngjarjes dhe kanë gjetur viktimën femër e cila dyshohej pa shenja jete, ndërsa ekipi mjekësor ka konstatuar vdekjen e saj”, thuhej në raportin e Policisë.

Rrethanat se si vdiq Kameri, ende nuk janë zbardhur. Mediat kanë raportuar se e njëjta ishte në hotel me një 32 vjeçar nga Peja dhe se dyshja kishin pasur një përplasje verbale pak para se të ndodhte ngjarja tragjike. Këto raportime s’janë konfirmuar asnjëherë nga autoritetet.

Nga Prokuroria Themelore e Prishtinës i kanë thënë Gazetës Express se bashkë me Policinë, po vazhdojnë hetimet për këtë rast. Informacione të tjera kanë thënë se s’mund të ndajnë për të ruajtur integritetin e procesit. S’kanë treguar as se si është kualifikuar rasti.

“Referuar pyetjeve tuaja, ju njoftojmë se Prokurori i Shtetit  në koordinim me policinë po vazhdojnë me hetimin e këtij rasti, andaj në këtë fazë nuk mund të japim informata të tjera për shkak të ruajtjes së integritetit të procesit hetimor”, Prokuroria Themelore e Prishtinës”, ka deklaruar zëdhënësja e Prokurorisë, Laureta Ulaj.

Një rast i ngjashëm kishte ndodhur edhe në muajin gusht të vitit të kaluar. Një 27-vjeçare nga Argjentina kishte vdekur pasi kishte rënë nga kati i gjashtë i një objekti në Fushë Kosovë.

Për rastin ishte arrestuar i dashuri i saj, Endrit Nikaj. Dyshohet se i njëjti e kishte gjuajtur argjentinasen nga kati i gjashtë, pas një mosmarrëveshje.

“VRASJE: Fushë Kosovë 01.08.2023 – 01:59. Nga QKUK-ja është raportuar se ka ndërruar jeta viktima femër shtetase e Argjentinës si pasojë e lëndimeve të marra, që dyshohet se ka rënë nga një lartësi e objektit ku ka qenë duke qëndruar së bashku me te dyshuarin mashkull shtetas Zvicran. Me vendim të prokurorit kujdestar, trupi i pa jetë i viktimës është dërguar në IML për obduksion, ndërsa i dyshuari është arrestuar dhe dërguar në mbajtje. Rasti ne procedure hetimore”, thuhej në raportin 24 orësh të Policisë.

Endrit Nika tani ndodhet në paraburgim. Gazeta zvicerane “Blick” ka raportuar se 32 vjeçari e kishte futur ilegalisht të dashurën e tij në Kosovë, duke e fshehur në bagazh të veturës.

E PREMTJA E BARDHË NË ETC ME ZBRITJE DERI 50%

Sponsoruar