Vaksinimi po vazhdon edhe këtë javë në Qendrën e Mjekësisë Familjare në Kalabri në Prishtinë, ku shihet se qytetarët po vaksinohen me dozën e tretë. Ata thonë se zgjidhja e vetme që kanë është vaksinimi për çka edhe kërkojnë nga qytetarët e tjerë që të vaksinohen.

Megjithatë, disa nga ata po ankohen edhe për hapësirën e ngushtë që ka kjo qendër.

Qytetari Jakup Dushullovci tregon se është vaksinuar me dozën e tretë dhe vaksinimi duhet bërë për të mbrojtur njëri-tjetrin.

“Dozën e tretë e mora sot edhe kurrfarë problem nuk pata…Vaksinat duhet me i marrë secili njeri për me ruajt njëri tjetrin, që mos me pas problem. Virusi i bie gjithkujt, por më lehtë kalon”, ka thënë ai.

Adem Govori tha se gjatë periudhës që ka qenë me COVID-19, ka pas probleme të mëdha e që arsyeja e kësaj siç thotë ai ka qenë mos-vaksinimi.

“Dozën e tretë e mora, presim tjerat nëse na i caktojnë dhe kështu e ndjej veten më mirë. Edhe të parën kur e kam marrë, edhe të dytën. Unë e kam kalu Covidin, por prapë dua me u sigurua se më lehtë, edhe me na ra e kalojmë me lehtë shumë. Ata e kanë për veti veç kur vinë si në gjendjen time që kam qenë pa vaksinu, e kam përjetua mezi kam shpëtuar. Tregoj se 20 ditë kam heq prej Covidit se nuk kam pas vaksinë, ndoshta edhe më lehtë e kisha kaluar. Kam pas shpesh me ardhur me marrë infuzione, gjilpëra për kundër trashjes të gjakut. Tash sa janë këto propaganda e këtyre po e frikësojnë edhe popullin, unë që sot e mora të tretën nuk kam pas kurrfarë pengese”, tha ai.

Ndërsa, Nazmi Gashi tregon se është imunizuar me dozën e tretë të vaksinës por që ankohet për sipërfaqen e kësaj qendre.

“Jam vaksinuar për më tepër se gjashtë muaj, tani erdha edhe vaksinën e tretë me marrë. Tani erdha këtu, për herë të parë i kam marrë të qendra sportive ‘1 tetori’, kështu që këtu kushtet më të këqija po shihen se më ngushtë, sipërfaqja më e vogël, kurse atje ka pasur një hapësirë shumë më të mirë. Apeli është që të gjithë të vaksinohen nuk ka tjetër zgjidhje, e vetmja është që të vaksinohemi. Unë po e shoh edhe në bazë të informatave. Të gjithë ata që nuk janë vaksinuar kanë telashe, probleme edhe janë të shtrirë në spital”, ka thënë ai për KosovaPress.

Kurse, Melihate Rrmoku tha se kishte problem me vaksinën e dytë, derisa shpreson se më këtë të mos ketë probleme.

“Me dozën e tretë jam vaksinuar, të dytën kam pas 2-3 netë problem, lutem të mos kem me këtë. Unë po mundohem me i bind shumë që të vaksinohen se në rregull është me u vaksinuar, gjithmonë i kemi marrë vaksinat”, ka thënë ajo.

Për shkak të rritjes së numrit të rasteve pozitive me COVID-19, Qeveria e Kosovës të premten ka vendosur për masat e reja, ku gastronomia lejohet të punojë deri në orën 21:00, kurse ora policore fillon nga ora 22:00.

BKS-ja kërkon nga Institucionet që sigurimi për bujqit të bëhët obligativ

Sponsoruar