Lajme

Vazhdon përplasja në distancë, Lladrovci ka një ‘selam’ të ri për Mulla Osmanin

Autori: H. Smajli 17:02 | 21 July 2021

Një deklaratë e hoxhës, Osman Musliu, i cili u lut që kryetari aktual i Drenasit, Ramiz Lladrovci të mos fitojë më në këtë komunë në zgjedhjet lokale të radhës, nxiti debat e përplasje mes tyre.

Përderisa në një intervistë për Gazetën inFokus, i pari i Drenasit e quajti Osmanin “Mulla rrenci” duke thënë se zoti nuk i dëgjon lutjet e tyre, hoxha i ka kthyer përgjigje të parit të Drenasit.

Mulla Osmani ka thënë se Lladrovci është këtu ku është për shkak të vëllait të tij dhe jo diplomave apo shkollës që ka kryer.

“Ani me babën hoxhë ani, mirë e ki ti! I kofsh falë që je vlla i kujt je, se sa për aftësitë dhe doktoraturat tua nuk t’kish ra me dal fort në sheher nga arat e fushat e Gllanasellës duke luajtur ‘pitpitak”, ka thënë ai për Reporterin.

Së fundmi, në një prononcim tjetër për Gazetën inFokus, Lladrovci sërish e ka quajtur hoxhën, “Mulla rrenci” , duke thënë se ai nuk meriton përgjigje tjetër përveç kësaj.

“Mulla rrenci nuk meriton përgjigje më të gjatë se atë që tashmë e kam bërë. Shnet”, ka thënë shkurt LLadrovci.

E gjithë kjo përplasje nisi nga deklarata e të martës e hoxhë Osmanit i cili tha për Lladrovcin “inshAllah [dashtë Zoti] nuk fiton në zgjedhjet e radhës”, kjo sipas tij për shkak të keqqeverisjes./Gazeta inFokus/

LEXO EDHE: “Zoti nuk i dëgjon lutjet e mulla rrencit”, Lladrovci i përgjigjet hoxhës që u lut keq për të

 

Të tjera