Opinione

Urgjentisht të kthehemi kah Perëndimi!

Autori: Gazeta inFokus 09:35 | 24 September 2023

Sulmi i mbrëmshëm ndaj Policisë së Kosovës, ku sipas raportimeve të mediave mbeti një polic i vrarë dhe një i plagosur, flet për rrezikun e shpërthimit të një konflikti të armatosur në veri të Kosovës aq shumë të dëshiruar nga Rusia e Serbia. Për më tepër ky është alarmi që kërkon një marrëveshje me Serbinë aq shumë të kërkuar nga Perëndimi edhe atë sa më shpejtë që të jetë e mundur.

Kosova vetëm falë ndihmës së Perëndimit është çliruar, pavarësuar e shtetndërtuar, përndryshe ende do të ishim nën Serbi e nën terror. Dhe vetëm me mbështetjen e Perëndimit mund ta shtrijmë sovranitetin në veri. Nuk zgjidhet çështja e veriut duke refuzuar Perëndimin, sepse Rusia e Serbia pikërisht këtë presin nga ne. Ky sulm ndaj policisë sonë reflekton pikërisht këtë.
Gjendja aktuale çfarë është në veri e ka paralizuar gjendjen e përgjithshme në vend: as ka zhvillim e as perspektivë, prandaj rinia po ikën me të madhe. Kjo gjendje e pashpresë po i konvenon vetëm Rusisë e Serbisë, të cilat trojet shqiptare i duan pa shqiptarë.

Prandaj, nëse pushteti aktual dëshiron ta shpëtojë vendin, duhet që qysh sot t’i përgjërohet Perëndimit, t’i ftojë Ambasadorët e Quintit dhe t’u përgjërohet për ndihmë e shpëtim. Nesër do të jetë tepër vonë. Është e turpshme dhe për më tepër antikombëtare vetëm ta mendosh faktin që pushteti aktual ka marrë kurs konftontimi me Perëndimin, për çfarë edhe është futur nën masa ndëshkimore perëndimore. Kjo duhet të ndryshojë sa më shpejtë që të jetë e mundur.

-Advertisement-

Pushteti aktual duhet të ulet në tokë e t’ua bëjë me dije qytetarëve që procesi i shtetndërtimit dhe shtetkompletimit është para sa gjithash proces 100% ndërkombëtar dhe se pa përfshirjen e ndërkombëtarëve nuk do të mund të zgjidhet kurrë. Historia jonë e dhimbshme është dëshmitarja më e mirë për këtë.

Pa ndihmën e SHBA-së si prijëse të Perëndimit, problemi i Kosovës me Serbi nuk do të zgjidhet asnjëherë. Prandaj, pushteti aktual duhet të reflektojë sa s’është bërë tepër vonë.

Ngushëllime për policin e vrarë, e shërim sa më shpejtë për të plagosurin! Respekt e përulje për Policinë e Kosovës! A.H.



Anëtarësohu në grupin e Infokus në Viber: GAZETA INFOKUS – VIBER – ANTARËSOHU

Dhe në grupin e Infokus në Facebook: GAZETA INFOKUS – FACEBOOK – ANTARËSOHU

Black Friday ne Artmotion

Të tjera

Fokusi

opinione