Lajme

Unaza qendrore e Prishtinës bëhet me “smart” ndriçim

Autori: Gazeta inFokus 19:50 | 01 July 2023

Prishjet eventuale në ndriçim publik nuk do të ketë më nevojë t’i lajmërojnë vetë. Nga kjo barrë, banorët e zonës së unazës qendrore në kryeqytet së shpejti pritet t’i kursejë teknologjia.

Tashmë ka filluar instalimi i infrastrukturës për ndriçimin e mençur që në mënyrë online do të komunikojë me Drejtorinë për Shërbime Publike, raporton “Ju Flet Prishtina”.

“Po flasim për një dhomë kontrolli e cila na e mundëson me e kontrollu ndriçimin në kryeqytet, ku në kohë reale i marrim të gjitha shënimet, për energjinë që po shpenzohet, si dhe njoftime rreth dëmtimeve. Kjo na mundëson me rregullu edhe pjesën e ndriçimit në aspektin e kapacitetit, prej 0 në 100 varësisht nga nevoja”, bëri të ditur drejtori Ilirik Musliu.

-Advertisement-

Ndriçimi që do të rregullohet me led, pritet që të kursejë të paktën për 60% energjinë elektrike. Derisa plani është që ky projekt të shtrihet në tërë kryeqytetin, duke vazhduar në zona të tjera nga viti i ardhshëm.

Njohës të fushës këtë e kishin sugjeruar kohë më parë.

“Kemi pas shumë raste kur ndriçimi publik edhe gjatë ditës ka qenë i ndezur, kur është smart ai automatikisht ndalet. Kjo ndikon edhe në të hyrat e Komunës, çmimi i 1kW për ndriçim publik është 10.66 cent plus tarifa e tvsh”, deklaroi Burim Ejupi, Drejtor në INDEP.

Qytetarët, ndërkaq, presin lehtësira nga ky investim pasi tregojnë raste kur u deshën disa ditë pritje për një rregullim nga ana e Komunës.

Projekti total që parasheh të rregullohet ndriçimi edhe në disa zona të tjera në Prishtinë, pritet të kushtojë 600.000 euro.

Subscribe në YouTube: GAZETA INFOKUSI
Etiketa:
Kryetari Përparim Rama pjesë e ‘Mayor’s Talk’
-Advertisement-

Të tjera

Fokusi

lajme