Numri i lartë i zjarreve në të gjithë territorin e vendit ka rritur dyshimet se një pjesë e tyre janë vendosur me qëllim.Nisur nga këto dyshime, javën e fundit janë proceduar 5 shtetas dhe vijojnë hetimet për rastet të tjera.Komisariati i Policisë në Delvinë ndaloi 2 shtetas të dyshuar si autorë të djegies së një sipërfaqe prej 80 ha kullote dhe shkurre në Malin e Muzgësë.

Të ndaluar janë K.Zh. 45 vjeç dhe N.H. 36 vjeç.

Policia e Shkodrës arrestoi një person pasi dyshohet për zjarrvënie të qëllimshme. P.P. 64 vjeç dyshohet se në fshatin Hot i Ri i kishte vendosur zjarrin disa shkurreve ku është djegur një sipërfaqe me rreth 5 dynym barë dhe shkurre.Në Lezhë është arrestuar F.S. 55 vjeç, pasi dyshohet se ndezi një zjarr në tokën në pronësi të tij, por zjarri ka dalë jashtë kontrollit duke djegur 30 traversa prej druri të shinave të trenit të linjës hekurudhore Shkodër-Lezhë.

Policia e Vlorës arrestoi 63 vjeçarin Y.H. si autor i dyshuar i zjarrit në fshatin Mavrovë ku është djegur një sipërfaqe toke prej 150 ha pyll, shkurre dhe një sipërfaqe tjetër prej 2.2 ha në të cilën janë shkatërruar rreth 300 rrënjë ullinj.

Ndërkohë Policia e Shtetit paralajmëron të gjithë qytetarët që ndezin zjarre të qëllimshme apo nga pakujdesia, se do të ndëshkohen ashpër sipas ligjit.- Neni 151 i Kodit Penal, ‘Shkatërrimi i pronës me zjarr’ parashikon: Shkatërrimi apo dëmtimi me dashje i pronës me zjarr dënohet me gjobë ose me burgim gjer në pesë vjet. Kur nga vepra penale janë shkaktuar pasoja të rënda materiale, dënohet me burgim gjer në dhjetë vjet.- Neni 206/a ‘Shkatërrimi me zjarr i pyjeve dhe i mjedisit pyjor’ parashikon: Shkatërrimi apo dëmtimi me dashje, me pasoja të rënda materiale, i fondit pyjor, i fidanishtes pyjore, i grumbullit pyjor ose i çdo njësie të ngjashme me to, me zjarr, dënohet me burgim nga tre deri në pesë vjet dhe me gjobë nga 500 000 (pesëqind mijë) lekë deri në 1 000 000 (një milion) lekë.

Po kjo vepër, e kryer me qëllim ndryshimin e kategorisë dhe destinacionit të tokës, dënohet me burgim nga tre deri në dhjetë vjet dhe me gjobë nga 500 000 (pesëqind mijë) lekë deri në 1.000.000 (një milion) lekë. Po kjo vepër, kur ka shkaktuar pasoja të rënda për pronën, shëndetin ose jetën e njerëzve apo shkakton dëme të rënda dhe të zgjatura në kohë ndaj mjedisit apo zonave të mbrojtura, dënohet me burgim nga pesë deri në pesëmbëdhjetë vjet dhe me gjobë nga 1 000 000 (një milion) lekë deri në 2 000000 (dy milionë) lekë.- Neni 206/b ‘Shkatërrimi nga pakujdesia me zjarr i pyjeve dhe i mjedisit pyjor’, parashikon: Shkatërrimi apo dëmtimi nga pakujdesia, me pasoja të rënda materiale, i fondit pyjor, i fidanishtes pyjore, i grumbullit pyjor ose i çdo njësie të ngjashme me to, me zjarr, dënohet me burgim nga një deri në tre vjet.

Po kjo vepër, kur ka shkaktuar pasoja të rënda për pronën, shëndetin ose jetën e njerëzve apo shkakton dëme të rënda dhe të zgjatura në kohë ndaj mjedisit apo zonave të mbrojtura, dënohet me burgim nga dy deri në pesë vjet.Ministria e Punëve të Brendshme dhe Drejtoria e Emergjencave Civile u bëjnë thirrje qytetarëve të mos ndezin zjarre në zonat malore dhe ato me pyje, ndërsa në rastet kur konstatojnë zjarre të telefonojnë menjëherë në numrat e emergjencës 112 dhe 129 apo 128.

Prince Caffe pjesëmarrës në panairin “Gulfood Fair 2024” në Dubai

Sponsoruar