Lajme

Ultimatumi i Odës së Hotelerisë, Sogojeva: Nëse s’përmbushen kërkesat tona do të protestojmë ashpër

Autori: Gazeta inFokus 15:28 | 04 November 2021

Oda e Hotelerisë dhe Turizmit, gjatë ditës së sotme i ka dhënë ultimatum Qeverisë se nëse deri në ditën e premte nuk realizohen kërkesat e tyre, atëherë do të bëhen protesta të ashpra.

Në lidhje më këtë Gazeta Infokus ka komunikuar me kryetarin e Odës Hotelerisë dhe Turizmit, Hysen Sogojeva.

Ai në një prononcim për Infokusin tha se nuk e sheh si rrezikim jetën e qytetarëve me mbajtjen e ahengjeve dhe aktiviteteve të tjera në këtë sektor, shkruan Gazeta Infokus.

-Advertisement-

Sogojeva tha se nuk e rrezikojnë jetën pasi që në fillim duan të fillojnë me 50%, ku asnjëri nuk do të mund të hyjë pa vaksinim apo pa test negativ.

“Jo nuk mendojmë qe e rrezikojmë, ne kemi thënë qe me fillu me 50% për arsye se ne kemi kërkuar qe asnjë person nuk mund të hyjë në lokale nëse nuk i ka vaksinat ose testin negativ, sepse pa to nuk do të ketë shanse që të hyjë në lokal, plus regjistrin pronari është i detyruar të mbajë, sepse jena zotuar para zëvendëskryeministrit që regjistrin ka me pasë edhe Ministria, edhe ne”, tha Sogojeva për Gazetën Infokus.

Ndërsa, sa i përket ultimatumit të paralajmëruar për Qeverinë, Sogojeva tha se kanë pasur një takim me zëvendëskryeministrin dhe me Ministrinë e Shëndetësisë, ku janë dakorduar që kërkesat e tyre të hyjnë në këshillin ndërministror.

Sogojeva shtoi se nëse nuk do të realizohen kërkesat e tyre atëherë organet e Odës do të marrin ndonjë vendim që mund të jenë edhe të ashpra.

“Ne kemi pasur takim me zëvendëskryeministrin edhe me ministrin e Shëndetësisë dhe në njëfarë forme me komunikim konstruktiv u dakorduam që kërkesat tona me i shti në Këshillin Ndërministror, prandaj tash po presim dhe në qoftë se nuk realizohet kjo, normalisht që ne kemi organet e Odës dhe Oda do të vijë me vendime që mund të jenë edhe të ashpra, por mund të jenë edhe forma të tjera”, shtoi Sogojeva për Gazetën Infokus.

Subscribe në YouTube: GAZETA INFOKUSI