Lajme

Ukraina: Rrëzuam 26 dronë rusë gjatë natës

Autori: Gazeta inFokus 10:11 | 26 September 2023

Rusia ka sulmuar Ukrainën me 38 dronë gjatë natës, tha të martën forca ajrore e Kievit, ndërsa këta të fundit rrëzuan 26 prej tyre.

Megjithatë, porti i Danubit për eksportimin e drithërave ukrainase, Izmail, u godit sërish.

Dronët që depërtuan e goditën infrastrukturën përreth Izmailit, duke i dëmtuar më shumë se 30 automjete dhe duke i lënduar dy vozitës gjatë sulmit që zgjati dy orë, tha guvernatori rajonal i Odesas, Oleg Kiper.

-Advertisement-

Që nga korriku, kur Moska u tërhoq nga marrëveshja e ndërmjetësuar nga Kombet e Bashkuara e cila mundësonte eksportimin e sigurt të drithërave përmes Detit të Zi, Rusia i ka shtuar sulmet ndaj infrastrukturës së Ukrainës për eksportimin e drithërave në jug të Odesas dhe në rajonet e Mikolavit.

“U regjistrua lëshimi i 38 mjeteve ajrore pa pilot, Shahed-136/131, nga drejtime juglindore”, tha forca ajrore në Telegram.

Forca ajrore dhe njësitë ushtarake “shkatërruan 26” dronë të prodhuar nga Irani, shtoi ajo.

Izmail, i cili ndodhet në kufi me anëtaren e NATO-s, Rumaninë, është shndërruar në një rrugë kryesore të eksportit për prodhimet bujqësore të Ukrainës, qëkur Rusia u tërhoq nga marrëveshja për drithërat.

Ky qytet është sulmuar vazhdimisht nga dronët rusë gjatë natës në javët e fundit. Rusia dhe Ukraina janë dy fuqi të madhe bujqësore, furnizimet e të cilave janë jetike për sigurimin e ushqimit botëror.

Pushtimi i Ukrainës nga Moska në shkurt të vitit të kaluar – dhe si pasojë sanksionet ndërkombëtare ndaj Rusisë – i kanë destabilizuar tregjet botërore dhe furnizimin me drithëra.

Si pasojë e sulmit gjatë natës së fundit, katër persona u plagosën në fshatin Kiselivka në rajonin e Hersonit, tha guvernatori Oleksandr Prokudin./ REL

Subscribe në YouTube: GAZETA INFOKUSI