Sport

UEFA e nderon presidentin Vokrri me një minutë heshtje

Autori: Gazeta inFokus 17:53 | 12 June 2018

Zëvendëspresidenti i FFK-së, Agim Ademi dhe menaxheri i licencimeve, Bajram Shala, po e përfaqësojnë Kosovën në Kongresin e FIFA-s dhe në ceremoninë e hapjes së Kampionatit Botëror “Rusia 2018”, shkruan infokusi.

Derisa punimet e Kongresit të FIFA-s do të mbahen nesër në orën 9:00, sot presidenti i UEFA-s, Aleksander Ceferin ka mbajtur një takim paraprak me të gjithë anëtarët e këtij asociacioni. Ky takim ka nisur me një minutë heshtje në nderim të presidentit Fadil Vokrri, derisa presidenti i UEFA-s e ka kujtuar presidentin e FFK-së me fjalët më të mira, si një njeri të jashtëzakonshëm, futbollist kulminant dhe si punëtor të madh e vizionar për zhvillimin e futbollit kosovar.

LEXO EDHE: Barcelona transferon super mesfushorin holandez

-Advertisement-

Krahas ngushëllimit për humbjen e presidentit Vokrri, Ceferin shprehu gatishmëri dhe përkrahje maksimale për të vazhduar rrugën e presidentit Fadil Vokrri nga bashkëpunëtorët për zhvillimin e futbollit, organizimin e federatës dhe përfundimin e projekteve që UEFA ka bërë për Kosovën.

Ndërkaq, nga ana e tij, zv.presidenti FFK-së, Agim Ademi u zotua se bashkë me Komitetin Ekzekutiv, sekretarin gjeneral dhe strukturat e tjera të FFK-së do ta vazhdojnë rrugën e nisur për zhvillimin e futbollit të Kosovës, gjithmonë nën bashkëpunim të ngushtë me UEFA-n. Ndërkohë, delegacionin e FFK-së e ngushëlluan për humbjen e presidentit Vokrri të gjithë delegatët e federatave kombëtare që janë të pranishme në Moskë.

Nesër në Kongresin e FIFA-s do të votohet për kandidaturën e Botërorit 2026, ku në garë janë kandidatura e përbashkët SHBA/Meksikë/Kanada dhe kandidatura e Marokut. /infokusi.com

Subscribe në YouTube: GAZETA INFOKUSI

Të tjera

Fokusi

sport