Fokus

U inaugurua pa u bërë pranimi teknik, spitali “Sheikha Fatima” rri i mbyllur tash e gati tre muaj

Autori: Kastriot Zeneli 15:14 | 03 December 2021

Më 13 shtator të këtij viti është bërë inaugurimi i Spitalit të Fëmijëve “Sheikha Fatima” në hapësirat e QKUK-së, donacion ky i Emirateve të Bashkuara Arabe, mirëpo ky spital po vazhdon të qëndrojë i mbyllur.

Në Ministrinë e Shëndetësisë thonë se ende nuk është bërë pranimi teknik i objektit dhe tek pasi të kryhet ky proces do të fillohet me përgatitjet për funksionalizim të spitalit.

Në një prononcim për Gazetën Infokus, Drin Podrimqaku, nga kabineti i Ministritë të Shëndetësisë tha se pas aprovimit të pranimin teknik, komiteti drejtues do të filloj me përgatitjet për funksionalizim.

“Njësia për zbatimin e projektit duhet të rekomandoj pranimin teknik dhe pastaj komiteti drejtues ta aprovoj. Pas aprovimit teknik do të fillohet me përgatitjet për funksionalizim, përmes një plani të veprimit që parasheh funksionalizimin e çdo shërbimi të paraparë në këtë spital, në përputhje me infrastrukturën e tij dhe resurset njerëzore që duhet angazhuar aty”, tha Podrimqaku, për Gazetën Infokus.

Tutje Podrimqaku shtoi se qysh në vitin 2020 janë themeluar komitetin drejtues dhe njësitë për zbatimin e projektit të këtij Spitali.

“Ministria e Shëndetësisë në vitin 2020 ka themeluar mekanizmat për zbatimin e projektit të Spitalit Pediatrik, donacion nga Emiratet e Bashkuara Arabe, komitetin drejtues dhe njësinë për zbatimin e projektit”, shtoi Podrimqaku për Infokus.

Kujtojmë se Spitali për Kirurgji të Fëmijëve ka një kapacitet prej 100 shtretërve, ku vetëm në njërin kat ka katër salla të operacionit ndërsa secila dhomë e pacientëve përbëhet nga një banjo dhe vetëm me nga dy shtretër.

Ndërtimi i këtij spitali kishte nisur në mars të vitit 2016, ndërsa kostoja e tij ishte rreth 22 milionë euro./Gazeta Infokus/

Të tjera