Lajme

Trump prezanton një kartë që iu siguron të huajve qëndrimin e përhershëm në SHBA, ja sa duhet të paguhet

Autori: Gazeta inFokus 10:59 | 26 Shkurt 2025

Donald Trump ka thënë se SHBA-ja do të shesë “karta të arta” që kushtojnë pesë milionë dollarë në këmbim të qëndrimit të përhershëm për të tërhequr të huajt e pasur në Amerikë.

Presidenti amerikan e bëri njoftimin teksa foli me gazetarët në Shtëpinë e Bardhë të martën pasdite, duke thënë se skema do të jepte “privilegje të “green card”-ës” dhe “rrugë drejt shtetësisë” për ata që blejnë atë, sipas Financial Times, përcjell Insajderi.

“Njerëz të pasur do të vijnë në vendin tonë përmes blerjes së kësaj karte. Ata do të jenë të pasur dhe do të jenë të suksesshëm, do të shpenzojnë shumë para dhe do të paguajnë shumë taksa dhe do të punësojnë shumë njerëz”, tha Trump.

-Advertisement-

Howard Lutnick, sekretari i tregtisë i SHBA-së, i cili përkrahte Trumpin në Zyrën Ovale ndërsa fliste, tha se programi i “kartës së artë” do të zëvendësonte skemën EB-5, e cila ofron viza për investitorët e huaj.

Me programin e ri, pjesëmarrësit do të paguajnë tarifën prej pesë milionë dollarësh drejtpërdrejt nga qeveria e SHBA’së.

“Ata do të duhet të kalojnë verifikimin, natyrisht“, tha Lutnick.

Shumë vende ofrojnë shtetësi ose rezidencë nga programet e investimeve, por ato janë vënë nën shqyrtim për rreziqet e sigurisë, si dhe shqetësimet për korrupsionin e mundshëm dhe evazion fiskal.