Presidenti Donald Trump mbajti një fjalim të gjatë të martën mbrëma, ku mes të tjerash akuzoi mediat, duke i barazuar gazetarët me tradhtarët dhe duke duke i quajtur ata “njerëz të këqij që nuk e pëlqejnë vendin tonë”.

Gjatë një tubimi politik në Qendrën e Konferencave në Finiks të Arizonës, presidenti lexoi deklaratat e mëparshme në të cilat ai kritikonte neo-nazistët dhe Ku Klux Klanin pas përplasjes fatale të 12 gushtit në Sharlotsvill të Virxhinias.

Por Presidenti la pa përmendur fjalët që ngjallën më shumë debate javën e kaluar, me të cilat ai fajësonte për dhunën “të dyja palët”.

Zoti Trump akuzoi gjithashtu mediat se nuk i raportonin komentet e tij.

“A i përmendi media fjalët e mia se racizmi është i keq?”

“Jo!” – u përgjigj turma me zë të lartë.

“Unë jam njeri që dëshiron të tregojë të vërtetën,” tha zoti Trump. “Jam njeri i ndershëm.”

Kritikon senatorët republikanë

Dy senatorët republikanë të Arizonës, të cilët që të dy janë përplasur me presidentin, nuk morën pjesë në tubimin me përkrahësit e Presidentit. Zoti Trump kritikoi si senatorin John McCain ashtu edhe senatorin Jeff Flake, por pa përmendur emrat e tyre.

Prania e zotit Trump në shtetin perëndimor të Arizonës, ku ai mundi demokraten Hillary Clinton me 3.5 përqind më shumë në zgjedhjet presidenciale të vitit të kaluar, tërhoqi dhjetëra mijëra mbështetës dhe protestues në qendër të qytetit Finiks. Autoritetet kishin marrë masa të forta sigurie për të parandaluar dhunën.

Protestuesit hidhnin parrulla provokuese ndaj atyre që prisnin në radhë për të hyrë në sallën e tubimit, duke thirrur: “Turp, turp”, “Nuk ka urrejtje në shtetin tonë”, dhe “Jo Trumpit, Jo KKK-së, Jo një Amerike fashiste”.

Mbështetësit, të cilët mbajtën radhë për orë të tëra në temperaturat e nxehta të Arizonës, thërrisnin: “Ndërtoni muret”. Shumë prej tyre mbanin kapele të kuqe me sloganin e fushatës së zotit Trump “Ta bëjmë Amerikën përsëri të madhe”.

Pak minuta pasi zoti Trump kishte përfunduar tubimin e tij në stil fushate, policia hodhi gaz lotsjellës mes protestuesve jashtë ndërtesës.

Përgjatë kufirit amerikan

Para tubimit politik në kryeqytetin e Arizonës, presidenti shkoi në një bazë të Marinsave në Juma, në kufirin me Meksikën, dhe në një qendër operacionesh të Patrullës Kufitare amerikane në zonë.

Premtimi i njohur i zotit Trump për të ndërtuar një mur përgjatë kufirit SHBA-Meksikë ishte ndër temat e tij kryesore në tubim.

Drejtori i përkohshëm i agjencisë amerikane për Imigracionin dhe Doganën, Tom Homan, u tha gazetarëve në aeroplanin presidencial që drejtohej për në Arizona: “Mesazhi i presidentit është se ne kemi nevojë për një kufi të fortë, kemi nevojë për një zbatim më të fortë të ligjit…”

Vizita e Presidenti Trump në bazën e Patrullës Kufitare përfshinte një inspektim të mjeteve fluturuese, duke përfshirë një helikopter dhe një dron, si dhe takime për të vlerësuar rezultatet operacionale, politikat dhe moralin e Patrullës Kufitare “në prag të vitit fiskal 2018”, u tha gazetarëve një zyrtar tjetër i administratës.

Kongresi nuk e ka përfunduar ende punën për një buxhet të qeverisë amerikane për vitin fiskal 2018, i cili fillon më 1 tetor.

Meridian Express hap marketin e ri në qytetin e Mitrovicës Veriore!

Sponsoruar