Presidenti i Kosovës, Hashim Thaçi, përmes një postimi në Facebook ka thënë se gati të gjitha shtetet e Bashkimit Europian janë duke e mbështetur arritjen paqësore të një marrëveshje mes Kosovës dhe Serbisë.

Ai tha se kjo marrëveshje qëllim kryesor ka njohjen e Kosovës nga Serbia dhe anëtarësimin e Kosovës në BE, NATO dhe OKB.

Sipas tij, opozita në Kosovë dhe disa individë të shoqërisë civile po i japin kuptim negativ përpjekjeve të tij.

“Pra, përderisa në njërën anë kemi të gjithë aleatët e lirisë dhe pavarësisë së Kosovës në mbështetje të fuqishme për arritjen e marrëveshjes paqësore me Serbinë, fatkeqësisht në Kosovë, në anën tjetër kemi një opozitë të ndihmuar nga disa zëra të vetmuar të shoqërisë civile që e konsiderojnë këtë mbështetje si qëllimkeqe për Kosovën”, tha Thaçi.

“Nuk ka fatkeqësi më të madhe për shtetin dhe qytetarët e Kosovës kur disa parti opozitare apo individë e vendosin në pikëpyetje përkrahjen e SHBA-së dhe aleatëve tanë kryesorë. Kjo situatë është për keqardhje”, shtoi presidenti.

Deklaratat se ai po punon në kundërshtim me aleatët ndërkombëtarë dhe se po e cenon sovranitetin shtetërorë, sipas Thaçit janë vetëm propagandë.

“Sovraniteti shtetëror dhe integriteti territorial i Republikës së Kosovës është i garantuar nga Kushtetuta jonë dhe jo nga deklaratat emocionale të atyre që as nuk e kanë idenë sesi është fituar liria dhe pavarësia e jonë. Kjo propagandë e paskrupullt e partive opozitare kundër aleatëve tanë ndërkombëtarë, e mbështjellë me panikun për gjoja cenimin e sovranitetit shtetëror, është e rrezikshme dhe e turpshme.

Kurrë asnjë e keqe nuk i vjen Kosovës nga mbështetja e aleatëve tanë perëndimorë. E vetmja e keqe që mund t’i vijë vendit tonë është vetëm nga ata që nuk duan marrëveshje paqësore me Serbinë, që nuk duan anëtarësim të Kosovës në BE, NATO dhe OKB.”, shkroi Thaçi.

Prandaj edhe u propozon qytetarëve që ta zgjedhin referendumin në mënyrë që Kosova të integrohet në BE.

“Qytetarët tanë duhet të bëjnë zgjedhjen e tyre nëpërmjet referendumit. Ata duhet të zgjedhin se a janë për marrëveshje paqësore me Serbinë, e cila Kosovës i siguron anëtarësim në BE, NATO dhe OKB, apo duan të jetojnë në hasmëri me shtetet fqinje dhe të izoluar. Unë e di që ata do të zgjedhin opsionin e parë, prandaj edhe po punoj në koordinim të ngushtë me aleatët tanë ndërkombëtarë, që paqja me fqinjë dhe integrimi të jenë zgjedhja e duhur. HTH”, përfundoi Thaçi.

Çka do të thotë të gatuash shqip?

Sponsoruar