Forcat izraelite sulmuan Libanin jugor dhe zonat në periferi të Bejrutit të premten, duke vrarë të paktën pesë mjekë dhe trupat tokësore u përleshën me luftëtarët e Hezbollahut në jug.

Izraeli ka vazhduar fushatën intensive ushtarake kundër Hezbollahut, një organizatë që mbështetet nga Irani, duke i dhënë një goditje shpresave se përpjekjet e të dërguarit amerikan për Lindjen e Mesme do të rezultonin në arritjen e një marrëveshjeje armëpushimi në një të ardhme të afërt.

Ndërmjetësi amerikan Amos Hochstein tha këtë javë në Bejrut se arritja e një marrëveshjeje armëpushime ishte “shumë afër”. Ai udhëtoi për të takuar kryeministrin izraelit Benjamin Netanyahu dhe ministrin e mbrojtjes Israel Katz përpara se të kthehej në Uashington, tha gazeta “Axios”.

Udhëtimi i tij kishte për qëllim t’i jepte fund luftimeve mbi një vjeçare mes Izraelit dhe Hezbollahut përgjatë kufirit jugor të Libanit, të cilat u përshkallëzuan kur Izraeli shtoi sulmet e tij në fund të shtatorit dhe dërgoi trupa tokësore në Liban më 1 tetor.

Trupat izraelite kanë luftuar Hezbollahun në një brez qytetesh përgjatë kufirit dhe këtë javë hyn më thellë në periferi të Khijamit, një qytet rreth gjashtë kilometra larg kufirit Izrael-Liban.

Hezbollahu tha se kishte kryer sulme me raketa ndaj trupave izraelite në lindje të Khijamit të paktën katër herë të premten. Burime libaneze të sigurisë thanë për agjencinë e lajmeve Reuters se trupat izraelite kishin avancuar gjithashtu në një varg fshatrash në perëndim. Sipas këtyre burimeve, Izraeli ka shumë të ngjarë të përpiqet të rrethojë qytetin e Khijamit përpara se ta sulmojë atë.

Një sulm ajror izraelit në një ndërtesë pranë Spitalit Universitar Dar Al-Amal në provincën e Balbekut, në verilindje të Libanit, shkaktoi vrasjen e drejtorit të spitalit dhe gjashtë kolegëve të tij, tha të premten ministria e shëndetësisë e Libanit.

Katër ushtarë italianë u plagosën lehtë pasi dy raketa shpërthyen në një bazë të forcave paqeruajtëse të OKB-së në Libanin jugor, UNIFIL, tha të premten një zëdhënës i tyre.

Burimet italiane thanë se kishin filluar një hetim mbi këtë sulm. Ministri i Jashtëm Antonio Tajani tha për mediat italiane se Hezbollahu mund të jetë përgjegjës për sulmin.

Sulmet izraelite në dy fshatra të tjerë në Libanin jugor shkaktuan vrasjen e pesë mjekëve nga një ekip kërkim-shpëtimi i lidhur me Hezbollahun, tha ministria libaneze e shëndetësisë.

Më shumë se 3,500 njerëz janë vrarë nga sulmet izraelite në Liban që nga fundi i vitit të kaluar, përfshirë më shumë se 200 mjekë, tha ministria libaneze e shëndetësisë.

Afati i fundit për regjistrime në programin MSc. Data Science & Analytics në UNI – Universum International College – Powered…

Sponsoruar