Lajme

A do të dalë fituese LVV-ja në zgjedhjet e 22 tetorit?

Autori: Gazeta inFokus 12:40 | 22 June 2017

Politologu Ramush Tahiri beson se rezultati i zgjedhjeve të 11 qershorit do të ndikojë edhe në zgjedhjen e sivjetme lokale, shkruan “Zeri.info”.

“Ky është vullnet i votuesve që e përcjell trendin e ndryshimit”, ka thënë Tahiri.

Sipas tij “Vetëvendosje” mund të prijë dukshëm në zgjedhjet lokale.

-Advertisement-

Për dallim prej tij analisti Dimal Basha nuk beson se rezultatet e zgjedhjeve lokale do ta nxjerrin LVV-në në listën e fituesve, siç ndodhi më 11 qershor.

“Unë besoj se do të kemi ndryshime edhe në zgjedhjet lokale, mirëpo nuk pres që të jenë të një niveli që kemi përjetuar në zgjedhjet qendrore. Kjo sepse “truri” i lëvizjes ‘Vetëvendosje’ është kryesisht i përqendruar në Prishtinë, kurse jashtë saj kjo parti ende ka deficit kapacitetesh njerëzore për t’i sfiduar seriozisht pushtetet lokale”, ka përfunduar Basha për “Zeri.info”,

Në anën tjetër, analisti politik Imer Mushkolaj mendon se rezultati i zgjedhjeve parlamentare nuk mund të “përkthehet” bllanko në rezultat të zgjedhjeve lokale.

“Trendi, inercioni i rezultatit të zgjedhjeve parlamentare do të vazhdojë edhe në zgjedhjet lokale. Por, zgjedhjet lokale janë shumë më specifike dhe njerëzit nuk votojnë për të njëjtat arsye si në ato parlamentare”, ka deklaruar ai.

Më tej, Mushkolaj ka theksuar se në zgjedhjet lokale kanë shumë rëndësi kandidatët dhe premtimet e tyre.

“Shumë e rëndësishme në zgjedhjet lokale është se cilët do të jenë kandidatët për kryetarë komunash dhe çfarë premtimesh do të japin ata. Po ashtu e rëndësishme është se çfarë është realizuar e çfarë jo gjatë mandatit katërvjeçar nga kryetarët aktualë”, ka potencuar Mushkolaj./ZERI/.

Subscribe në YouTube: GAZETA INFOKUSI