Shefi i Grupit Parlamentar të AAK-së, Besnik Tahiri, ka kërkuar nga kryeministri Albin Kurti që t’i ftojë në një takim krerët e partive politike, shkaku i situatës në veri të vendit.

Sipas Tahirit, temat e sigurisë, kanë qenë preokupim dhe angazhim i vazhdueshëm i tyre, me ç’rast tha se janë duke i adresuar nëpërmjet interpelancave, punës në komisionet e Kuvendit, pyetjeve parlamentare dhe debateve.

“Megjithatë, tema e parë të cilën dua ta adresoj sot lidhet me shqetësimet që AAK-ja i ka në raport me gjendjen në vend, e cila është shumë serioze dhe kërkon përgjegjësi institucionale dhe veprim shtetëror. Në emër të AAK-së e ftoj kryeministrin Kurti që urgjentisht të thërras në një takim krerët e partive politike parlamentare, për të diskutuar dhe për të çuar një mesazh të bashkimit dhe unitetit politik karshi gjendjes në vend. Planet djallëzore të Serbisë, tani më i kanë kaluar vijat e kuqe, si rrjedhojë, uniteti në këto situata është jashtëzakonisht i rëndësishëm”, tha Tahiri.

-Advertisement-

Ai pasqyroi edhe aktivitetin e Grupit Parlamentar të AAK-së gjatë vitit 2022.

“Raporti prezanton angazhimet si: rezolutat parlamentare, interpelancat, nismat ligjore, amandamentet, debatet, pyetjet parlamentare dhe tryezat. Grupi Parlamentar i AAK-së e konsideron se angazhimi parlamentar ka qenë i prirë në përfaqësimin e drejtë të interesit të qytetarëve dhe shtetit. Në rend të parë i ndërtuar mbi tema jetike për qytetarët e Republikës së Kosovës, si ato të ndërlidhura me situatën e sigurisë, politike, dialogu, partneriteti me aleatët, sovraniteti dhe ato socio-ekonomike si ekonomia, inflacioni, ndikimi enorm në rritjen e çmimeve, por edhe ato shoqërore si grevat, kërkesat për rritjen e pagave”, tha Tahiri.

“Njëkohësisht, kemi ofruar kontribut dhe alternativa, nisur nga dialogu dhe konsolidimit të shtetësisë, rreth krijimit të qartësisë dhe besueshmërisë me aleatët, e deri tek problemet specifike, sikurse lehtësirat fiskale, e një seri temash e çështjesh. Temat e sigurisë, kanë qenë preokupim dhe angazhim i vazhdueshëm, duke i adresuar nëpërmjet interpelancave, punës në komisionet e kuvendit, pyetjeve parlamentare dhe debateve. Kjo ka shërbyer në dy drejtime, e para për paralajmërim të hershëm për Qeverinë lidhur me situatën e rëndë, por edhe njëkohësisht për ta mbajtur të mbikëqyrur mbi këto zhvillime. Fokus i veçantë, këtë vit, kanë qenë diskutimet dhe debatet parlamentare për Ligjin për Zyrtarët Publik dhe Ligjin e Pagave. Duke nxitur, por edhe kontribuar që përmes miratimit të rezolutës, që Ligji i Pagave, të miratohet por edhe hyrja në fuqi sa më shpejt, por edhe për të alarmuar presionin për të vendosur kontroll partiak mbi administratën publike e rrezikuar në tërësi reformat”.

“Përgjithësisht ky vit është karakterizuar me paqartësi dhe pasiguri në disa rrafshe, si atë politik, sigurisë, social, ekonomik, e parasëgjithash për drejtimin e vendit. Krejt këto edhe pse në pamje të parë si veprime të ndara, kanë ndikuar në esencë në tri dimensione: e para, të instalimit më të madh të kontrollit partiak mbi shtetin; e dyta, në rritjen paqartësive e përplasjeve me aleatët, për pasojë rrezikim të sigurisë dhe arritjeve si vend; dhe treta, në mungesë të menaxhimit të krizave të importuara, janë prodhuar kriza socio-ekonomike të brendshme”.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-